`Interview' உஷார்... கத்தி முனையில் பெண் கடத்தல்... அடுத்து நேர்ந்த நிலை - அதிரும் திருப்பூர்

திருப்பூரை சேர்ந்த கமலி என்ற பெண், வேலை கேட்டு ஆன்லைனில் பதிவு செய்திருந்த நிலையில், கடந்த 7-ஆம் தேதி நேர்காணலுக்கு அழைக்கப்பட்டுள்ளார். ஆன்லைனில் அனுப்பிய முகவரிக்கு சென்ற நிலையில், கமலியை 2 நபர்கள் காரில் ஏற்றிச் சென்றதாக கூறப்படுகிறது. காரில் வெகுதூரம் சென்றதால் சந்தேகமடைந்த கமலி, தன்னை இறக்கி விடுமாறு கோரியபோது, ஒருவர் கமலியின் கையில் கத்தியை வைத்து மிரட்டியதாக கூறப்படுகிறது. சுதாரித்துக் கொண்ட கமலி, கத்தியை தட்டிவிட்டு காரிலிருந்து கீழே குதித்துள்ளார். இதனால் காயமடைந்த அவரை, பொதுமக்கள் மீட்டு அரசு மருத்துவமனையில் அனுமதித்தனர். இதுதொடர்பாக வழக்குப்பதிவு செய்த போலீசார், சாரதி மற்றும் மணிகண்டன் ஆகிய இருவரை கைது செய்து சிறையில் அடைத்தனர்.