புயல் பாதிப்பு நிதியுதவி : 4 ஆண்டு சேமிப்பை வழங்கிய பள்ளி மாணவன்

பள்ளி மாணவன் தான் 4 ஆண்டுகளாக சேமித்த நான்காயிரம் ரூபாயை கஜா புயலால் பாதிக்கப்பட்ட மக்களுக்கு உதவும் வகையில் வழங்கியுள்ளான். தூத்துக்குடி மாவட்டம் கோவில்பட்டி அருகே உள்ள அம்பாள் வித்யாஸ்ரமம் பள்ளியில் எட்டாம் வகுப்பு படிக்கும் மாணவன் அக்ஸய், நான்காயிரம் ரூபாயை விளாத்திகுளம் வட்டாட்சியர் ராஜ்குமாரிடம் வழங்கினான். செய்தியாளர்களிடம் பேசிய மாணவன் அக்ஸய், புயல் பாதித்த பகுதிகளில் மாணவர்கள் நோட்டு புத்தகங்களை இழந்திருப்பதால் அவர்கள் மீண்டு வர உதவியாக தான் சேமித்த பணத்தை வழங்குவதாக தெரிவித்தார்.