மணிப்பூரில் இளைஞர்கள் இருவர் கடத்தி கொலை செய்யப்பட்ட விவகாரத்தில் 4 பேர் கைது செய்யப்பட்டுள்ளனர்.
மணிப்பூர் வன்முறை இதுவரை நூற்றுக்கணக்கானோர் பலியாகி உள்ள நிலையில் மைதேயி இனத்தை சேர்ந்த 2 மாணவர்கள் கடந்த ஜூலை மாதம் 6ம் தேதி மாயமானார்கள். இம்பாலை சேர்ந்த பிஜாம் ஹேமன்ஜித் மற்றும் ஹிஜாம் லிந்தோய்ங்கன்பி ஆகிய அந்த இருவரும் கொலை செய்யப்பட்டது பின்னர் தெரியவந்தது.
இவர்கள் இருவரும் குக்கி குழுவினரால் கொல்லப்பட்டதாக தகவல்கள் வெளியானதையடுத்து மணிப்பூரில் பதற்றம் உச்சகட்டமானது. இந்நிலையில் இளைஞர்கள் கடத்தி கொலை செய்யப்பட்ட விவகாரத்தில் சம்பந்தப்பட்ட நான்கு முக்கிய குற்றவாளிகள் கைது செய்யப்பட்டு இருப்பதாக மணிப்பூர் முதல்வர் பிரேன் சிங் தெரிவித்துள்ளார். துணை ராணுவ படை அசாம் ரைபிள் மற்றும் மாநில காவல் துறை இணைந்து நடத்திய தேடுதல் வேட்டையில் சுரான்சந்த்பூர் பகுதியில் இருந்து நான்கு குற்றவாளிகளை கைது செய்திருப்பதாக அவர் தெரிவித்துள்ளார்.