பைக்கை திருப்பி கேட்ட சிறுவன்.. ஆபாசமான வார்த்தையால் திட்டிய 'ரவுடி' - ஆத்திரத்தில் வெட்டிய 4 பேர்

சென்னை ஓட்டேரி பகுதியைச் சேர்ந்த 17 வயது சிறுவன், தனது நண்பர் அபிஷேக்குடன், தலைமைச் செயலக காலனி பகுதிக்கு இருசக்கர வாகனத்தில் சென்றுள்ளார். அப்போது, பல்வேறு வழக்குகளில் தொடர்புடைய ரவுடி சக்திவேல் என்பவர், அவர்களை மடக்கி, கடைக்குச் செல்ல வேண்டும் எனக்கூறி, இரு சக்கரவாகனத்தை வாங்கிச் சென்றுள்ளார். நீண்ட நேரமாகியும் வராததால், சிறுவன் மற்றும் அபிஷேக் ஆகிய இருவரும், சக்திவேலை தேடிச் சென்றபோது, அவர் நண்பருடன் மது அருந்திக் கொண்டிருந்தது தெரியவந்தது. இருசக்கர வாகனத்தை திருப்பிக் கேட்டபோது, சக்திவேல் இருவரையும் தகாத வார்த்தைகளால் திட்டியதாக கூறப்படுகிறது. இதில் ஆத்திரமடைந்த சிறுவன், தனது நண்பர்கள் 3 பேரை அழைத்து வந்து, சக்திவேலை கத்தியால் சரமாரியாக தாக்கினார். இதில் படுகாயமடைந்த அவர், மருத்துவமனையில் அனுமதிக்கப்பட்டார். இதனிடையே, இந்த சம்பவத்தில் ஈடுபட்ட சிறுவன் மற்றும் ஹரிஷ் என்கிற ஆகாஷ், பரத், வினித் ஆகிய 4 பேரை போலீசார் கைது செய்தனர்.