20 ஆண்டு பகை.. காத்திருந்து கருவறுத்த வாரிசு..! டொக்கன் ராஜா கொலையில் சிக்கிய 9 பேர் - அதிர வைக்கும் பின்னணி

சென்னை மயிலாப்பூரில் பிரபல ரவுடி டொக்கன் ராஜா கொலை வழக்கில் 9 பேர் கைதான நிலையில், முக்கிய குற்றவாளி தீபன் என்பவர் கைது செய்யப்பட்டுள்ளார்.

கொலை, கொள்ளை, ஆள்கடத்தல் என 20-க்கும் மேற்பட்ட வழக்குகளில் தொடர்புடைய, மயிலாப்பூர் பல்லக்கு மாநகரை சேர்ந்த டொக்கன் ராஜாவை, கடந்த 9-ம் தேதி 6 பேர் கொண்ட கும்பல் வெட்டிக் கொலை செய்தது. இதுகுறித்து மயிலாப்பூர் போலீசார் வழக்குப்பதிவு செய்து விசாரணை நடத்தியதில், 20 ஆண்டுகளுக்கு முன்பு நடந்த கொலைக்கு பழிதீர்க்க கொலை நடந்தது தெரியவந்தது. 20 ஆண்டுகளுக்கு முன்பு, முன்விரோதம் எதுவும் இல்லாமல், ஏரியாவில் கெத்து காட்டுவதற்காக, ஆட்டுக்கறி வியாபாரம் செய்து வந்த கதிரவன் என்பவரை டொக்கன் ராஜா கொலை செய்துள்ளார். அப்போது, சிறு குழந்தையாக இருந்த கதிரவனின் மகன் நரேஷ் குமார் வளர்ந்து, கதிரவனின் தம்பி தீபனுடன் சேர்ந்து டொக்கன் ராஜாவை பழி தீர்த்துள்ளனர். இந்த வழக்கில், நரேஷ்குமார் உட்பட 9 பேர் ஏற்கனவே கைதான நிலையில், தலைமறைவாக இருந்த தீபனை கைது செய்தனர். அப்போது, போலீசாரிடம் இருந்து அவர் தப்பிக்க முற்பட்டு கீழே விழுந்ததில்இடது கை முறிவு ஏற்பட்டது. இதனால், மருத்துவமனையில் மாவு கட்டு போடப்பட்டு, சிறையில் அடைக்கப்பட்டுள்ளார்.