திடீர் ரெய்டு வந்த போலி ஐ.டி ஆபிசர்ஸ்.. - டிப்-டாப் ஆசாமிகளுக்கு போலீசார் வலை

திருச்சி மாவட்டம் துறையூரில் தொழிலதிபர் வீட்டில் வருமானவரித்துறை அதிகாரிகள்போல் நடித்து 5 லட்சம் ரூபாய் மற்றும் 5 பவுன் தங்க நகையை திருடிச் சென்ற கும்பலை போலீசார் தேடி வருகின்றனர்.

துறையூரைச் சேர்ந்த ஜவுளி வியாபார தொழிலதிபர் மதுரை வீரன். இவர் நடைபயிற்சி செய்வதற்காக வீட்டிலிருந்து வெளியே சென்றுள்ளார். வீட்டில் அவரது உறவினர் கிருஷ்ணவேணி மட்டும் இருந்துள்ளார். அப்போது சொகுசு காரில் டிப் டாப்பாக வந்திறங்கிய 5 பேர், தாங்கள் வருமான வரித்துறை அதிகாரிகள் எனவும் வீட்டை சோதனை செய்ய வந்துள்ளதாகவும் தெரிவித்துள்ளனர். தொடர்ந்து பீரோவை திறந்து 5 லட்சம் ரூபாய், ஐந்து பவுன் மதிப்புள்ள தங்க ருத்ராட்ச மாலையை எடுத்துச் சென்றுள்ளனர். மேலும், மதுரை வீரனை வருமான வரித்துறை அலுவலகத்திற்கு வரச்சொல்லிவிட்டு காரில் புறப்பட்டுள்ளனர். நடைபயிற்சி முடித்து வீட்டிற்கு வந்த மதுரை வீரன், இதனைக் கேட்டு அதிர்ச்சி அடைந்து போலீசில் புகார் அளித்துள்ளார். கைரேகை நிபுணர்கள் தடயங்களை சேகரித்துள்ள நிலையில், திருட்டு சம்பவத்தில் ஈடுபட்ட டிப்-டாப் ஆசாமிகள் குறித்து போலீசார் தீவிர விசாரணை நடத்தி வருகின்றனர்.