காருக்குள் சடலம்... குமரியை அலறவிட்ட கொலை... 3வது கண்ணால் சிக்கிய நபர்... வெளியான பகீர் பின்னணி

கன்னியாகுமரி மாவட்டம் களியக்காவிளை பகுதியில்... சாலையோரம் நின்ற காருக்குள் கேரளாவை சேர்ந்த தொழிலதிபர் தீபு கழுத்தறுக்கப்பட்ட நிலையில், சடலமாக கிடந்தது அதிர்ச்சியை ஏற்படுத்தியது. விசாரணையில், கல்குவாரி தொழில் செய்து வரும் தீபு... ஜேசிபி இயந்திரம் வாங்க 10 லட்சம் ரூபாய் பணத்துடன் கன்னியாகுமரி வந்தது தெரியவந்தது. உடனே, அருகில் உள்ள சிசிடிவி காட்சிகளை கைப்பற்றி போலீசார் ஆய்வு செய்த போது, காரில் இருந்து மர்மநபர் ஒருவர் பணப் பையுடன் இறங்கிச் செல்வது தெரியவர, போலீசார் விசாரணையை தீவிரப்படுத்தினர். இந்நிலையில், போலீசாரின் முதற்கட்ட விசாரணையில் அதிர்ச்சிகர தகவல்கள் வெளியாகியிருக்கிறது. தொழிலதிபர் தீபுவை கொன்றது, கேரளாவை சேர்ந்த பிரபல ரவுடி சசிக்குமார் என்பதை போலீசார் கண்டுபிடித்தனர். இவர் மீது கொலை கொள்ளை உள்ளிட்ட 50க்கும் மேற்பட்ட வழக்குகள் நிலுவையில் உள்ள நிலையில், சசிக்குமாரின் துணையுடனே தனது தொழிலை சசிக்குமார் நடத்தி வந்ததும் வெளிச்சத்திற்கு வந்தது. இந்த பரபரப்பு தகவல்களுக்கிடையே ரவுடி சசிக்குமாரை கைது செய்திருக்கும் போலீசார், அவரிடம் கொலைக்கான காரணம் குறித்து தீவிர விசாரணை நடத்தி வருகின்றனர்.