வாயில் நுரை தள்ளி கிடந்த சென்னை பெண்..கூண்டோடு சிக்கிய பிரபல யூடியூப் சேனல் - பெண் VJ, சேனல் ஓனர், கேமரா மேன் கைது

சென்னையில் இளம்பெண் தற்கொலைக்கு முயன்ற விவகாரத்தில், யூடியூப் சேனலின் பெண் வீ.ஜே. உள்ளிட்ட மூன்று பேர் கைது செய்யப்பட்டுள்ளனர். சென்னை கீழ்ப்பாக்கம் பகுதியில் உள்ள மாநகராட்சி பூங்கா ஒன்றில் இளம்பெண் ஒருவர் வாயில் நுரை தள்ளியபடி இருப்பதாக போலீசாருக்கு தகவல் கிடைத்தது. சம்பவ இடத்திற்கு விரைந்த போலீசார் அந்த பெண்ணை மீட்டு அரசு கீழ்ப்பாக்கம் மருத்துவமனையில் தீவிர சிகிச்சை பிரிவில் அனுமதித்தனர். 7 மாதங்களுக்கு முன்பு மால் ஒன்றில் தனியார் யூடியூப் சேனலுக்கு அந்த பெண் பேட்டி அளித்த‌தாகவும், அதில் ஆபாச வார்த்தைகள் சேர்த்து, அனுமதி இல்லாமல் சமூக வலைத்தளங்களில் பதிவேற்றம் செய்ததாகவும் கூறப்படுகிறது. வீடியோ ஆபாசமாக இருப்பதால் மன உளைச்சலில் இருந்த‌தாகவும், பெற்றோர், உறவினருக்கு தெரிந்துவிடும் என்ற அச்சத்தில் தற்கொலைக்கு முயன்றதாகவும் அவர் வாக்குமூலம் அளித்துள்ளார். இதையடுத்து, 2 பிரிவுகளின் கீழ் வழக்குப்பதிவு செய்த காவல்துறையினர், இளம்பெண்ணின் வாக்குமூலம் அடிப்படையில், யூடியூப் சேனல் உரிமையாளர் ராம வீரப்பன், பேட்டி எடுத்த ஸ்வேதா, ஒளிப்பதிவாளர் யோகராஜ் ஆகிய 3 பேரையும் கைது செய்த போலீசார், நீதிமன்றத்தில் ஆஜர்படுத்தி புழல் சிறையில் அடைத்தனர்.