தமிழக அமைச்சர்கள் 3 பேர் வெளிநாடு பயணம்

முதலமைச்சர் எடப்பாடி பழனிசாமி அமெரிக்காவில் சுற்றுப்பயணம் மேற்கொண்டுள்ள நிலையில், அமைச்சர்கள் விஜயபாஸ்கர், எம்.சி.சம்பத், ஆர்.பி. உதயகுமார் மற்றும் ராஜேந்திரபாலாஜி ஆகியோர் உடன் உள்ளனர்.  இதுமட்டுமின்றி அமைச்சர் திண்டுக்கல் சீனிவாசன் இந்தோனேஷியாவுக்கும், அமைச்சர் நிலோபர் கபில் ரஷ்யாவுக்கும், கடம்பூர் ராஜூ மொரிசியஸ் நாட்டுக்கும் சென்றுள்ளனர். பள்ளி கல்வி அமைச்சர் கே.ஏ.செங்கோட்டையன் பின்லாந்துக்கு சென்று விட்டு சென்னை திரும்பி விட்டார். இந்த சூழலில், சட்டத்துறை அமைச்சர் சி.வி.சண்முகம் மற்றும் உயர்கல்வித்துறை அமைச்சர் கே.பி.அன்பழகன் ஆகியோர் சிங்கப்பூர் சென்றுள்ளனர். சி.வி.சண்முகத்தின் அண்ணன் மகன் விபத்தில் சிக்கி சிகிச்சை பெற்று வரும் நிலையில் அவரை பார்ப்பதற்காக சி.வி. சண்முகம் சிங்கப்பூருக்கு  சென்றுள்ளார். இதேபோல் தனிப்பட்ட பயணமாக தன் குடும்பத்தினருடன் அமைச்சர் மாஃபா பாண்டியராஜன் துபாய் வழியாக எகிப்து நாட்டுக்கு சென்றுள்ளார். எனவே, வெளிநாடு சென்ற தமிழக அமைச்சர்களின் எண்ணிக்கை 10 ஆக உள்ளது என்பது குறிப்பிடத்தக்கது.