"ஆடுமாடுகளை போல் மக்களை விலைக்கு வாங்க பார்க்கிறார்கள்" - பொன். ராதாகிருஷ்ணன்

நீட் தேர்வை கொண்டுவந்த காங்கிரஸ் கட்சி, தற்போது நாடகமாடுவதாக மத்திய அமைச்சர் பொன். ராதாகிருஷ்ணன் குற்றம்சாட்டி​யுள்ளார். கன்னியாகுமரி மாவட்டம் மார்த்தாண்டம் அடுத்த கோட்டகம் பகுதியில் உள்ள கிருஷ்ணன் கோயிலில் வழிபாடு செய்த அவர், பின்னர் பிரசாரம் மேற்கொண்டார். தாமரைப் பூ கொடுத்தும், ஆள் உயர மாலை அணிவித்தும் அப்பகுதி பெண்கள் உள்ளிட்டோர் வரவேற்பு அளித்தனர். பின்னர் செய்தியாளர்களிடம் பேசிய பொன். ராதாகிருஷ்ணன், ஆடுமாடுகளை போல், மக்களை விலைக்கு வாங்க முயல்கின்றனர் என்றும், தேர்தல் ஆணைய அதிகாரிகள் நடவடிக்கை எடுக்க வேண்டும் என்றும் கூறினார். நீட் தேர்வை கொண்டுவந்தது காங்கிரஸ்தான் என்றும், 18ம் தேதிக்கு பிறகு நீட்டாக பேசுவார்கள் என்றும் அவர் சாடினார்.