கோலிவுட்டை பரபரக்க வைத்த நடிகையின் வாக்குமூலம் - வசமாக சிக்கும் பல சினிமா, சீரியல் ஸ்டார்ஸ்?

சென்னையில் மெத்தபெட்டமைன் விற்பனை செய்து வந்த துணை நடிகையை போலீசார் கைது செய்துள்ள சம்பவம் பெரும் பரபரப்பை ஏற்படுத்தியுள்ள நிலையில், சினிமா, சீரியல் பிரபலங்களுக்கு மெத்த பெட்டமைன் போதை பொருள் விற்கப்படுகிறதா ? என்ற கோணத்தில் போலீசார் விசாரணை முடுக்கியுள்ளனர். இதன் பின்னணியை பார்க்கலாம் விரிவாக...

சென்னையில் கஞ்சா, கொக்கைன் போன்ற போதை பொருட்களின் புழக்கம் அதிகரித்து வர, வெளிநாடுகளில் கிடைக்கும் அதிக வீரியம் கொண்ட மெத்தபெட்டமைன் போதை பொருளுக்கான மவுசும் கூடி வருகிறது என்றே சொல்லலாம்...

இப்படி காட்டுத்தீயாய் பரவி வரும் போதை பொருள் புழக்கத்தை, வேரோடு ஒழிக்க சென்னை காவல்துறையினர் பிரத்யேக குழு ஒன்றை அமைத்து அதிரடி நடவடிக்கைகளில் ஈடுபட்டு வருகின்றனர்.

இந்நிலையில் தான் சென்னை ராயப்பேட்டையில் உள்ள பிரபல மால் அருகே இளம்பெண்ணிடம் போதை பொருள் இருந்ததாக போலீசாருக்கு தகவல் கிடைத்துள்ளது.

சம்பவ இடத்திற்கு விரைந்த போலீசார், அங்கிருந்த இளம்பெண்ணை கைது செய்த போது தான், அது பிரபல தனியார் தொலைக்காட்சி சீரியலில் நடித்த எஸ்தர் என்கிற மீனா என்பது தெரியவந்தது..

அவரிடமிருந்து 5 கிராம் மெத்தபெட்டமைன் போதைப் பொருட்களை பறிமுதல் செய்துள்ளனர்.

பின்னர் அவரிடம் மேற்கொண்ட விசாரணையில் பல திடுக்கிடும் தகவல் வெளியானது. கைது செய்யப்பட்ட மீனா, கோவிலம்பாக்கத்தை சேர்ந்தவர் என்றும் கணவர் இல்லாததால் குடும்ப வறுமை காரணமாக வெள்ளித்திரை மற்றும் சின்னத்திரையில் சின்ன சின்ன கதாபாத்திரத்தில் நடித்து வந்ததும் தெரியவந்தது...

இவர் டெடி உள்ளிட்ட சில திரைப்படங்களிலும் சுந்தரி உள்ளிட்ட சீரியல்களிலும் துணை நடிகையாக நடித்த இவர், சினிமா மற்றும் சீரியல்களில் வாய்ப்பு அடிக்கடி வராததால் பண தேவைக்காக மெத்தபெட்டமைன் விற்பனை செய்ய தொடங்கியதாகவும் விசாரணையில் தெரிவித்துள்ளார்.

குறிப்பாக மொத்தமாக வாங்கினால் போலீசாரிடம் சிக்கிக் கொள்வோம் என கிராம் கணக்கில் மட்டுமே வாங்கி, கூடுதலாக மூன்றாயிரம் ரூபாய் அதிகம் வைத்து விற்பனை செய்யும் பணியில் ஈடுபட்டு வருவதாகவும் விசாரணையில் தெரிவித்துள்ளார்.

மேலும் போதைப் பொருட்களை சப்ளை செய்ய whatsapp குழு ஒன்று இருப்பதாகவும், அதில் ஹோல்சேல் டீலர்கள் இருக்கும் நிலையில், அந்த குழுவில் எவ்வளவு போதை பொருள் வேண்டும் எனக் குறிப்பிட்டால் ஒரு இடத்தை தேர்வு செய்து அங்கே வர வைப்பார்கள் என பகீர் கிளப்பியுள்ளார்.

அதன்படி, தான் ஐந்து கிராம் மெத்தபெட்டமைன் போதை பொருட்களை வாங்குவதற்காக ராயப்பேட்டை பகுதிக்கு சென்றபோது போலீசார் சுற்றிவளைத்து கைது செய்திருப்பதாகவும் விசாரணையில் தெரிவித்துள்ளார்...

மேலும், கைது செய்யப்பட்ட துணை நடிகை மீனா, சினிமா மற்றும் சீரியல்களில் உள்ள பிரபலங்களுக்கு போதை பொருள் சப்ளை செய்யும் பணியில் ஈடுபட்டாரா? இந்த போதை பொருளை யாரிடம் இருந்து வாங்கி வருகிறார் என்ற பல கோணங்களில் போலீசார் விசாரணை நடத்தி வருகின்றனர்...

அத்துடன், இந்த போதை பொருளை வாங்கும் சினிமா மற்றும் சீரியல் பிரபலங்களிடமும், விசாரணை நடத்த போலீசார் திட்டமிட்டு இருப்பதாகவும் தகவல் தெரிவித்துள்ளனர்...