சாலையோரம் நிறுத்தியிருந்த லாரியில் கட்டுகட்டாக ரூ.50.68 லட்சம் பணம்.. திருச்சியை அதிரவிட்ட சம்பவம்

திருச்சி மாவட்டம் பெட்டவாய்த்தலை, காவல்காரன் பாளையம் பகுதியில் கடந்த ஆகஸ்ட் 3ல் காய்கறி லோடு ஏற்றி வந்த லாரியில் இருந்து, மர்ம நபர்கள் சிலர் 50 லட்சத்து 68 ஆயிரம் ரூபாய் பணத்தை திருடிச்சென்றனர். இது தொடர்பாக காவல் நிலையத்தில் வழக்கு பதிவு செய்த நிலையில், 5 தனிப்படை அமைக்கப்பட்டு குற்றவாளிகள் தேடப்பட்டு வந்தனர். இந்த நிலையில், சம்பந்தப்பட்ட குற்றவாளிகள் நவலூர் குட்டப்பட்டு பகுதியில் சுற்றி திரிவதாக தகவல் கிடைத்தது. விரைந்து சென்ற தனிப்படை போலீசார் அப்பகுதியில் நிறுத்தப்பட்டிருந்த, காரில் சோதனை நடத்தினர். அப்போது காரில் இருந்து தப்பிச்செல்ல முயன்ற 5 பேரை போலீசார் மடக்கிப் பிடித்து விசாரணை நடத்தினர். கைது செய்யப்பட்டவர்கள் , தூத்துக்குடியை சேர்ந்த பிரவீன் குமார், திருநெல்வேலி மாவட்டத்தை சேர்ந்த போஸ், வெள்ளை பாண்டி, முத்து மணிகண்டன், சூர்யா என தெரியவந்தது. இவர்கள் லாரியில் பணம் திருடியது உறுதியான நிலையில், அவர்களிடம் இருந்து 26 லட்சம் ரூபாய் பணம் மீட்கப்பட்டது. குற்றவாளிகள் அனைவரும் மத்திய சிறையில் அடைக்கப்பட்டனர்.