கையோடு அழைத்து லைவ்வாக பிரச்சனையை காட்டிய ஆட்டோ டிரைவர் - சொன்ன இடத்திலேயே உறுதி கொடுத்த மேயர்

தஞ்சையில் ஆய்வுக்கு சென்ற மாநகராட்சி மேயர் ராமநாதனிடம், ஆட்டோ ஓட்டுநர் ஒருவர் சரமாரியாக கேள்வி எழுப்பினார். பூக்குளம் பகுதியில் மேயர் ராமநாதன் ஆய்வுக்காக சென்றார். அப்போது, மேயரின் வாகனத்தை வழிமறித்து தனது ஆட்டோவை நிறுத்திய தங்கதுரை என்பவர், பாதாள சாக்கடை உடைப்பு குறித்து பலமுறை புகார் அளித்தும் ஓராண்டாக எந்த நடவடிக்கையும் எடுக்கப்படவில்லை என குற்றம்சாட்டினார். மேயர் ராமநாதன் சமாதானம் செய்ய முயன்றும், ஆட்டோ ஓட்டுநர் தங்கதுரை அடுக்கடுக்கான கேள்விகளை முன்வைக்க, கோரிக்கைகளை நிறைவேற்றித் தருவதாக மேயர் உறுதி அளித்தார்.