சென்னை நேப்பியர் பாலத்திலிருந்து கூவத்தில் குதித்த பெண்ணை காப்பாற்றிய ஆட்டோ ஓட்டுநரை, காவல் ஆணையர் சந்தீப் ராய் ரத்தோர் நேரில் அழைத்து பாராட்டினார்.
சென்னை திருவல்லிக்கேணியை சேர்ந்த ஆட்டோ ஓட்டுநர் மகேஷ் என்பவர் சவாரிக்காக, மெரினா நேப்பியர் பாலம் அருகே சென்று கொண்டிருந்தார். அப்போது ஒரு பெண், பாலத்திலிருந்து கூவம் ஆற்றில் குதித்து சேற்றில் மூழ்கிக் கொண்டிருந்தது தெரியவந்தது. இதையடுத்து பொதுமக்கள் உதவியுடன் கயிறு வழியாக, கூவம் ஆற்றில் இறங்கி, சேற்றில் சிக்கித்தவித்த பெண்ணை மீட்டு பாலத்தில் கொண்டு சேர்த்தார். பின்னர் அந்தப் பெண், சிகிச்சைக்காக அரசு மருத்துவமனையில் சேர்க்கப்பட்டார். ஆந்திராவை சேர்ந்த மகேஷ், ஓராண்டுக்கு முன் சென்னையில் குடும்பத்துடன் தங்கி ஆட்டோ ஓட்டி வருவது தெரியவந்தது. அவரை, காவல் ஆணையர் சந்தீப்ராய் ரத்தோர் நேரில் அழைத்து, 5 ஆயிரம் ரூபாய் பரிசு மற்றும் சான்றிதழ் வழங்கி பாராட்டினார்.