கிறிஸ்துமஸ் எதிரொலி.. விமான டிக்கெட்கள் விலை உயர்வு
கிறிஸ்துமஸ் பண்டிகை காரணமாக சென்னையில் இருந்து தென் மாவட்டங்களுக்கு செல்லும் பயணிகளுக்கான விமான டிக்கெட் கட்டணம் 2 மடங்கு உயர்வு
கிறிஸ்துமஸ் பண்டிகை காரணமாக சென்னையில் இருந்து தென் மாவட்டங்களுக்கு செல்லும் பயணிகளுக்கான விமான டிக்கெட் கட்டணம் 2 மடங்கு உயர்ந்துள்ளது.கிறிஸ்துமஸ் பண்டிகைக்காக சென்னையில் இருந்து தென் மாவட்டங்களுக்கும் செல்லும் பயணிகளால் விமானங்களின் முன்பதிவு நிரம்பி வருகின்றன. சென்னையில் இருந்து தூத்துக்குடிக்கு 4 விமானங்களும், மதுரைக்கு 6 விமானங்களும், திருவனந்தபுரம் மற்றும் கொச்சிக்கு தலா 2 விமானங்களும் இயக்கப்படுகின்றன. இதற்கான விமான டிக்கெட் முன்பதிவு வேகமெடுத்த நிலையில் ஒரு சில இருக்கைகள் மட்டுமே உள்ளன. இதனால் சென்னையில் இருந்து தூத்துக்குடி செல்லும் விமான டிக்கெட்டின் கட்டணம் நான்காயிரத்து200 ரூபாயில் இருந்து 10 ஆயிரத்து 400 ரூபாயாகவும், மதுரை விமான கட்டணம் 9 ஆயிரத்து 600 ரூபாய் வரையிலும் உள்ளது. இதேபோன்று திருவனந்தபுரம் செல்லும் விமான கட்டணம் 10 ஆயிரத்து 700 ரூபாயாகவும், கொச்சிக்கு செல்லும் விமான கட்டணம் 9 ஆயிரத்து 500 ரூபாயாகவும் உயர்ந்துள்ளது. இது தொடர்பாக பேசிய விமான அதிகாரிகள், குறைந்த கட்டணம் கொண்ட இருக்கைகள் நிரம்பியதால் உயர்கட்டண இருக்கைகளையும் பயணிகள் முன்பதிவு செய்துள்ளதாக தெரிவித்தனர்.