"ஆர்.எஸ்.எஸ் திட்டங்களை பா.ஜ.க. செயல்படுத்துகிறது" - நாடாளுமன்ற உறுப்பினர் திருமாவளவன்

இந்திய அரசியலமைப்பு சட்டத்தை மாற்றுவதே பா.ஜ.க.வின் அடுத்த நோக்கமாக இருக்கும் என்று விடுதலை சிறுத்தைகள் கட்சியின் தலைவர் திருமாவளவன் விமர்சித்துள்ளார்.  சூட்டி மகிழ்வோம், தூய தமிழ்ப்பெயர்கள் என்ற நூல் அறிமுக  விழா, தமிழியக்கம் சார்பில்,  சென்னை அண்ணா நகரில் நடைபெற்றது. இதில் பங்கேற்ற பின்னர் செய்தியாளர்களை சந்தித்த திருமாவளவன், ஆர்.எஸ்.எஸ் வரையறுக்கும் திட்டங்களை அரசியல் களத்தில் நடைமுறை படுத்துவதே பாஜகவின் பணி என்றார்.  ஆர்.எஸ்.எஸ் அமைப்பின் நீண்ட கால கனவு திட்டமாக இருந்த ஜம்மு காஷ்மீர் சிறப்பு அந்தஸ்து நீக்குவதை பா.ஜ.க. அரசு செயல்படுத்தி இருப்பதாக திருமாவளவன் கூறினார். ராமர் கோவில் கட்டுவது, இந்தியாவிற்கு இந்து இராஷ்டியம் என பெயர் சூட்டுவது ஆகிய ஆர்.எஸ்.எஸ் அமைப்பின் திட்டங்களை நடைமுறைபடுத்த அரசியல் அமைப்பு சட்டத்தை மாற்றுவதற்கான முயற்சிகளை பா.ஜ.க. மேற்கொள்ளும் என்றும் திருமாவளவன் குறிப்பிட்டார்.