அண்ணா பல்கலைகழகத்தில் வாக்கு எண்ணும் மையத்தில் நுழைந்த மாணவரால் பரபரப்பு
வாக்குப்பதிவு இயந்திரங்கள் வைக்கப்பட்ட அறை அருகே செல்ஃபி எடுத்த மாணவரை போலீசார் விசாரணைக்கு அழைத்து சென்றனர்.
சென்னை அண்ணா பல்கலைகழகத்தில் தென் சென்னை தொகுதியில் பதிவான வாக்குப் பதிவு இயந்திரங்கள் வைக்கப்பட்டுள்ளது. இந்நிலையில் இயந்திரங்கள் வைக்கப்பட்ட அறை அருகே கல்லூரி மாணவர் ஜெய்சூர்யா என்பவர் செல்ஃபி எடுத்துள்ளார். இதை கண்ட பாதுகாப்பு போலீசார் மாணவரை கோட்டூர்புரம் காவல் நிலையத்திற்கு விசாரணைக்காக அழைத்து சென்றனர்.போலீஸ் விசாரணையில் இறுதி ஆண்டு முடித்து விட்டதால், கல்லூரி ஞாபகார்த்தமாக செல்ஃபி எடுத்ததாக மாணவர் கூறியுள்ளார். அவரிடம் மன்னிப்பு கடிதம் வாங்கி விட்டு போலீசார் விடுவித்தனர்.