துரைமுருகன் பேச்சால் சட்டப்பேரவையில் சிரிப்பலை

சட்டப்பேரவையில் பட்ஜெட் உரை மீதான விவாதங்களுக்கு பதிலளித்து துணை முதலமைச்சர் பன்னீர்செல்வம் பேசும்போது, வரவு செலவு விவரங்கள், கடன் அளவுகள் குறித்து திமுக மற்றும் அதிமுக ஆட்சி செயல்பாடுகள் குறித்து ஒப்பீடு செய்து பேசினார். அப்போது, புள்ளி விவரங்களை எதிர்க்கட்சி துணைத் தலைவர் துரைமுருகன் கூர்மையாக கவனித்துக் கொண்டிருப்பதாக கூறினார். இதற்கு பதில் அளித்து பேசிய துரைமுருகன், தாம் கூர்ந்து கவனிக்கவில்லை என்றும், தங்களது ஆட்சியை பற்றி  நிதித்துறை செயலாளர் எழுதி கொடுத்தது போன்றே அதிமுக ஆட்சியிலும் எழுதி கொடுத்திருப்பதாக கூறினார். சபையின் அலுவல் எப்போது முடியும் என எதிர்ப்பார்த்து கொண்டிருப்பதாக கூறினார். துரைமுருகன் கூறியதை கேட்டதும் அவையில் சிரிப்பலை எழுந்தது.