`கர்மா..' விபத்தில் சிக்கிய செயின் கொள்ளையர்கள்... அப்படியே தூக்கிய காவல்துறை

சென்னையில் உள்ள தாம்பரம் கடப்பேரி திருநீர்மலை சாலையில் சுமதி என்ற பெண்ணிடம் இரு சக்கர வாகனத்தில் சென்ற கொள்ளையர்கள் 4 சவரன் தங்கச் செயினை கொள்ளையடித்தனர். இது தொடர்பாக சுமதி புகார் தெரிவித்த நிலையில், போலீசார் வழக்கு பதிவு செய்து கொள்ளையர்களை தேடிவந்தனர். திருநீர்மலை சாலையில் இருந்து 300 சிசிடிவி கேமராக்களை போலீசார் ஆய்வு செய்தனர். பூந்தமல்லி வரை கொள்ளையர்கள் இரு சக்கர வாகனத்தில் வந்த காட்சிகள் பதிவான நிலையில், அதன் பிறகு பதிவாகவில்லை. இதனை தொடர்ந்து மேற்கொண்ட விசாரணையில், கொள்ளையர்கள் விபத்தில் சிக்கியது தெரியவந்தது. இந்த நிலையில் மருத்துவமனையில் சிகிச்சை பெற்று வந்த அம்பத்தூரை சேர்ந்த சீனிவாசன், அய்யம்பாக்கத்தை சேர்ந்த விஜயன் ஆகிய இருவரையும் போலீசர் விசாரணை செய்தனர். விசாரணையில் இருவரும் கொள்ளைச் சம்பவத்தில் ஈடுபட்டது உறுதியானது. இருவரும் பல நாட்களாக கொள்ளைச் சம்பவத்தில் ஈடுபட்டு வந்த நிலையில், தற்போது கைது செய்யப்பட்டுள்ளனர். அவர்களிடம் இருந்து 4 சவரன் தங்கச் செயின் மற்றும் கொள்ளைக்கு பயன்படுத்தும் கத்தி உள்ளிட்டவற்றை போலீசார் பறிமுதல் செய்தனர்.