ஊட்டி சிறுமியின் குடும்ப பின்புலம் தெரிந்ததும் பலர் பல காலகட்டங்களில் பலாத்காரம் - திடுக் அம்பலம்

உதகையில் 10ம் வகுப்பு மாணவி பாலியல் பலாத்காரம் செய்யப்பட்ட வழக்கில் முன்னாள் காதலன் உள்பட 4 பேர் கைது செய்யப்பட்டுள்ளனர். மேலும் 3 பேரை போலீசார் தேடி வருகின்றனர்

உதகையில் கூலித் தொழிலாளி தம்பதியின் 16 வயது மகளும் மார்க்கெட்டில் டிரைவராக உள்ள தொட்ட பெட்டாவைச் சேர்ந்த ஹரீஷும் காதலித்து வந்துள்ளனர். இருவரிடையே பிரச்சினை ஏற்பட்டு, பிரிந்துள்ளனர். இந்தநிலையில் கடந்த 10ம் தேதி தோழிகளை பார்க்க செல்வதாக கூறி, வெளியில் சென்ற மாணவி நீண்ட நேரமாகியும் வீடு திரும்பவில்லை. இதனால் அதிர்ச்சியடைந்த மாணவியின் தாய் காவல் நிலையத்தில் புகாரளித்தார்... விசாரணை நடைபெற்று வந்த நிலையில் கடந்த 13ம் தேதி மாணவி மீண்டும் வீடு திரும்பியுள்ளார்... விசாரணையில் மாணவி மேட்டுப்பாளையம் சென்ற போது ஏற்கனவே முகநூல் மூலம் அறிமுகமான அதே பகுதியைச் சேர்ந்த காஜா என்பவர் சிறுமியை வீட்டுக்கு அழைத்துச் சென்று பாலியல் பலாத்காரம் செய்தது தெரிய வந்துள்ளது. இதையடுத்து சிறுமி மருத்துவ பரிசோதனைக்காக மருத்துவமனையில் அனுமதிக்கப்பட்ட நிலையில் விசாரணையில் பல திடுக்கிடும் தகவல்கள் வெளிவந்துள்ளன. அதாவது ஏற்கனவே முன்னாள் காதலன் ஹரீஷும் சிறுமியை பாலியல் பலாத்காரம் செய்துள்ள நிலையில், சிறுமியின் குடும்ப சூழ்நிலை மற்றும் வறுமையை பயன்படுத்தி வெவ்வேறு காலகட்டங்களில் பலரும் சிறுமியிடம் பழகி அவரை பாலியல் பலாத்காரம் செய்தது தெரிய வந்துள்ளது. இதைத் தொடர்ந்து காஜா, ஹரிஷ், இடுஹட்டியை சேர்ந்த பிரவீன், பெந்தட்டியை சேர்ந்த பிரேம்குமார் உள்பட 7 பேர் மீது போக்சோ சட்டத்தின் கீழ் வழக்குப்பதிவு செய்த போலீசார் ஹரிஷ், பிரவீன், பிரேம்குமார் ஆகியோரை கைது செய்து சிறையில் அடைத்தனர்.