மருமகனை வளைத்த மாமியார்... குறுக்கே நின்ற கணவன்... கதையை முடித்த மகள்... போலீசை திகைக்க வைத்த கொலை

ஊத்தங்கரையில் வசித்த 55 வயதாகும் கோவிந்தசாமி என்பவர், கடந்த மாதம் 24-ம் தேதி விபத்தில் இறந்ததாக கூறப்பட்டது. ஆனால், போலீஸ் விசாரணையில் இது திட்டமிட்ட கொலை என்பதும், இதற்குப் பின்னால் கள்ளக்காதல் முக்கிய காரணமாக இருந்ததும் தெரியவந்தது. கோவிந்தசாமியின் மனைவி மாதேஸ்வரிக்கு, அவரது மருமகனுடன் கள்ளக்காதல் இருந்ததாக கூறப்படுகிறது.

இதனால் பல நாட்களாக விரக்தியில் இருந்த கோவிந்தசாமி, மனைவியிடம் தொடர்ந்து பிரச்னையில் ஈடுபட்டுள்ளார். இதையடுத்து, மனைவி காவல் நிலையத்தில் புகார் அளித்த நிலையில், போலீசார் இருவரையும் சமாதானம் செய்து அனுப்பியுள்ளனர். இதில் கோபமடைந்த மனைவி மாதேஸ்வரி, மகளுடன் சேர்ந்து கொலை செய்ய திட்டம் திட்டி, கூலிப்படையை நியமித்துள்ளார். இதன்படி, கோவிந்தசாமிக்கு வேலை வாங்கி தருவதாகக் கூறி வரவழைத்து மதுவாங்கிக்கொடுத்த கொலையாளிகள், பின்னர் கிரிக்கெட் பேட்டால் அடித்துக்கொன்று, இருசக்கர வாகனத்தில் இருந்து விழுந்தது போல் நாடகமாடியது தெரியவந்தது. இவ்வழக்கில், மாதேஸ்வரி, அவரது மகள் மற்றும் கூலிப்படையைச் சேர்ந்த வேல்முருகன், சிவகாசி ஆகியோர் கைது செய்யப்பட்ட நிலையில், தலைமறைவாக உள்ள பிரசாந்த், முஷாரப் மற்றும் நந்துவை போலீசார் தேடி வருகின்றனர்.