காலேஜ் பெண்கள் முன்னே கெத்து காட்டிய இளைஞன்... "இங்க கொஞ்சம் வா தம்பி" - வசமாக காத்திருந்த ஆப்பு

கன்னியாகுமரி மாவட்டம், நாகர்கோவிலில், சாலையில் விபத்தை ஏற்படுத்தும் வகையில் காரில் அதிவேகமாக பயணம் செய்து, இன்ஸ்டாவில் இளைஞர்கள் பதிவேற்றம் செய்தது அதிர்ச்சியை ஏற்படுத்தி உள்ளது.

கடந்த சில தினங்களுக்கு முன் நாகர்கோவிலில் உள்ள தனியார் கல்லூரியில் பயிலும் மாணவர் ஒருவர், திருவனந்தபுரம் கன்னியாகுமரி சாலையில் கல்லூரி பெண்கள் முன்பாக கெத்து காட்டி இருசக்கர வாகனத்தில் பயணம் செய்தார். இதுதொடர்பான வீடியோ காட்சிகள், குமரி மாவட்ட காவல் கண்காணிப்பாளர் பார்வைக்கு நேரடியாக சென்றதை அடுத்து, அந்த மாணவரை காவல் நிலையத்துக்கு வரவழைத்து, போக்குவரத்து விதிமுறைகளை மீறியதற்காக 4 ஆயிரம் ரூபாய் அபராதம் விதித்தனர். மீண்டும் இதேபோன்று சாகசத்தில் ஈடுபட்டால் கடும் நடவடிக்கை எடுக்கப்படும் என்றும் மாணவரின் பெற்றோருக்கு எச்சரிக்கை விடுக்கப்பட்டது. இந்த நிலையில் அதே திருவனந்தபுரம் கன்னியாகுமரி சாலையில் ரீல்ஸ் மோகத்திற்கு அடிமையான மற்றொரு இளைஞர், தனது சொகுசு காரை, சாலையில் அங்கும் இங்குமாக திருப்பி பொதுமக்களுக்கு ஆபத்து ஏற்படுத்தும் வகையில் அதிவேக பயணம் செய்துள்ளார். இந்த காட்சிகள் வெளியானதை அடுத்து, மாவட்டம் முழுவதும் வாகன சோதனையை போலீசார் தீவிர படுத்த வேண்டும் என பொதுமக்களும், சமூக ஆர்வலர்களும் கோரிக்கை விடுத்துள்ளனர்.