கொடைக்கானல் மலைப்பகுதியில் கடந்த ஒரு வாரத்தில் மட்டும் 2 ஆண் காட்டு யானைகள் உயிரிழந்திருப்பது அதிர்ச்சியை ஏற்படுத்தியுள்ளது.
பள்ளங்கி, கோம்பை, அஞ்சு வீடு உள்ளிட்ட மலை கிராமங்களில் கடந்த சில மாதங்களாகவே காட்டு யானைகள் முகாமிட்டு பயிர்களை சேதப்படுத்துவதுடன் மனிதர்களையும் தாக்கி வருகிறது. இந்நிலையில், ஆனைமலை புலிகள் காப்பகத்திற்கு உட்பட்ட கோம்பை அருகே மூங்கில் காடு வருவாய் நிலத்தில் காட்டு யானை ஒன்று உயிரிழந்து கிடப்பதாக வனத்துறைக்கு தகவல் கிடைத்தது. இதன் அடிப்படையில் விசாரணை மேற்கொண்டனர். இறந்து கிடந்தது 35 வயது மதிப்புள்ள ஆண் யானை என்றும், ஓடை பகுதியில் தண்ணீர் அருந்த வந்த போது கால் தவறி ஒடை பகுதிக்குள் விழுந்து உயிரிழந்ததாகவும் கூறப்படுகிறது. மேலும் உயிரிழந்து 5 நாட்களுக்கு மேல் ஆகியிருப்பதாகவும், தெரிவிக்கப்பட்டது. இதையடுத்து, உடற்கூறு ஆய்வு செய்து, தந்தங்களை கைப்பற்றிய வனத்துறையினர், அதே பகுதியில் உடலை புதைத்தனர். ஒரே வாரத்தில் 2 ஆண் யானைகள் உயிரிழந்துள்ளதால், வனத்துறையினர் கண்காணிப்பை தீவிரப்படுத்தி, யானைகள் உயிரிழப்பை தடுக்க வேண்டும் என கோரிக்கை எழுந்துள்ளது.