"வடகிழக்கு மாநிலங்கள் அஷ்டலட்சுமியை போன்றவை" - பிரதமர் மோடி நெகிழ்ச்சி | PM Modi | Delhi

தன்னை பொறுத்தவரையில் ஒட்டுமொத்த வடகிழக்கு மாநிலங்கள் அனைத்தும் அஷ்டலட்சுமியை போன்றவை என பிரதமர் மோடி தெரிவித்தார்.

டெல்லி சாய் இந்திரா காந்தி விளையாட்டு வளாகத்தில் முதலாவது போடோலாந்து பெருவிழாவை பிரதமர் மோடி தொடங்கி வைத்தார். விழாவில் போடோ சமூக மக்களின் கலை நிகழ்ச்சிகளையும் பிரதமர் மோடி கண்டுகளித்தார். பாரம்பரிய இசைக் கருவிகளையும் இசைத்து மகிழ்ந்தார். தொடர்ந்து உரையாற்றிய பிரதமர் மோடி, போடோ அமைதி ஒப்பந்தம் காரணமாக அசாம் மாநிலத்தில் மட்டும் 10 ஆயிரத்திற்கும் மேற்பட்ட இளைஞர்கள் துப்பாக்கியையும், வன்முறையையும் கைவிட்டு அமைதியின் நீரோட்டத்தில் இணைந்து இருப்பதாக மகிழ்ச்சி தெரிவித்தார். போடோலாந்து பகுதியில் சிறப்பு வளர்ச்சிக்காக மத்திய அரசு 1500 கோடி மதிப்பிலான சிறப்பு நிதி தொகுப்பை வழங்கி இருப்பதாக குறிப்பிட்ட அவர், தன்னை பொறுத்தவரையில் அசாம் மாநிலம் உட்பட ஒட்டுமொத்த வடகிழக்கு மாநிலங்கள் அனைத்தும் அஷ்டலட்சுமியை போன்றது என்றார். தற்போது வளர்ச்சி எனும் சூரியன் வடகிழக்கு இந்தியாவில் இருந்து உதிப்பதாகவும், வளர்ச்சி அடைந்த இந்தியா என்ற உறுதி மொழிக்கு இது புதிய ஆற்றலை வழங்குவதாகவும் குறிப்பிட்டார்.