“இங்க வா தம்பி உட்காரு..“ பள்ளிக்கு வராத 10ம் வகுப்பு மாணவன் -நேராக வீட்டுக்கே தேடிச் சென்ற ஆசிரியர்

பொள்ளாச்சியை அடுத்த பெத்தநாயக்கனூரில் இயங்கி வரும் அரசு உயர்நிலை பள்ளியில் சுமார் 200-க்கும் மேற்பட்ட மாணவ, மாணவிகள் படித்து வருகிறார்கள். தற்போது பத்தாம் வகுப்பு பொதுத்தேர்வு நடைபெற்று வருவதால், மாணவர்களுக்கு ஆசிரியர்கள் சிறப்பு வகுப்புகளை நடத்தி வருகின்றனர். அந்தப் பள்ளியில் பத்தாம் வகுப்பு படிக்கும் சஞ்சீவ் என்ற மாணவன், பள்ளிக்கு வராமல் பல காரணங்களை கூறி ஏமாற்றி வந்துள்ளார். இதை அறிந்த அறிவியல் ஆசிரியர் ராஜசேகர், சஞ்சீவின் வீட்டுக்குச் சென்று காரணத்தைக் கேட்டபோது, தனது சித்தி கோயில் திருவிழாவுக்குச் செல்வதால் பள்ளிக்கு வரவில்லை என்று ஒரு காரணத்தை கூறியுள்ளார். இதை ஏற்க மறுத்த ஆசிரியர், மாணவனுக்கு அறிவுரை கூறி, ஊர் மக்கள் மற்றும் பெற்றோர் உதவியுடன் தனது இருசக்கர வாகனத்தில் பள்ளிக்கு அழைத்து சென்றார். அந்தப் பள்ளி, சிறந்த பள்ளிக்கான தமிழக அரசின் காமராஜர் விருதை கடந்த 2017-ஆம் ஆண்டு பெற்றுள்ளது குறிப்பிடத்தக்கது.