திண்டுக்கல் அருகே நடைபெற்ற சேவல் கண்காட்சியில், ஒரு சேவல் 3 லட்ச ரூபாய் வரை விலை போனது.
திண்டுக்கல்லை அடுத்த குட்டியபட்டியில், அழிந்து வரும் சேவல் இனத்தை பாதுகாக்கும் வகையில் சேவல் கண்காட்சி நடைபெற்றது. இதில், தமிழகத்தின் பல்வேறு பகுதிகளில் இருந்தும், கர்நாடகா, ஆந்திரா, பாண்டிச்சேரி மற்றும் கேரளா ஆகிய வெளிமாநிலங்களில் இருந்தும் 400-க்கும் மேற்பட்ட சேவல்கள் பங்கேற்றன. கிளிமூக்கு சேவல், விசிறிவால் சேவல் , மயில் சேவல், காகம் கொன்றை உள்ளிட்ட பல்வேறு வகையான சேவல்கள் கண்காட்சியில் இடம்பெற்றிருந்தன. ஒரு சேவல் மூன்று லட்ச ரூபாய் வரை விலை போனது. இந்த சேவல் கண்காட்சியை காண்பதற்கு மாவட்டத்தின் பல்வேறு பகுதியில் இருந்து ஏராளமானோர் வந்திருந்தனர். அவர்களுக்கு மரக்கன்றுகள் இலவசமாக வழங்கப்பட்டன.