"C.off விடுமுறையை ஆப்சன்ட் என பதிவு"..கைக்குழந்தையுடன் போராட்டம் நடத்திய ஊழியர்

தஞ்சாவூர் அரசு போக்குவரத்து பணிமனையில், தனது சி.ஆப் விடுமுறை நாட்களை கிளை மேலாளர் ஆப்சன்ட்டாக பதிவு செய்து சம்பள இழப்பு ஏற்படுத்துவதாக கூறி ஊழியர் ஒருவர் குடும்பத்துடன் போராட்டம் நடத்தியது பரபரப்பை ஏற்படுத்தியது.தஞ்சாவூர், ஜெபமாலைபுரம் நகரில் உள்ள அரசு போக்குவரத்து பணி மனையில் பிரகாஷ் என்பவர் கிளை மேலாளராக பணி புரிந்து வருகிறார். அதே பணி மனையில் மணிகண்டன் என்பவர் மெக்கானிக்காக பணிபுரிந்து வரும் நிலையில், மணிகண்டனின் சி.ஆப் விடுமுறை நாட்களை பிரகாஷ் ஆப்சென்டாக பதிவு செய்து அவருக்கு சம்பள இழப்பை ஏற்படுத்தி வந்ததாக கூறப்படுகிறது. இந்த நடவடிக்கை தன்னை பொருளாதார ரீதியாக மிகவும் பாதித்து மன உளைச்சலுக்கு ஆளாக்கியதாக கூறிய மணிகண்டன், தனது மனைவி மற்றும் கைக்குழந்தையுடன் பணிமனை முன்பு போராட்டம் நடத்தியது பெரும் பரபரப்பை ஏற்படுத்தியது. மணிகண்டனின் இந்த போராட்டத்திற்கு சுமார் ஒரு மணி நேரம் பேருந்தை இயக்காமல் தொழிலாளர்கள் ஆதரவு கொடுத்தது குறிப்பிடத்தக்கது.