மதுரையில் வீடுகளுக்குள் புகுந்த வெள்ளநீர் - மக்கள் கடும் அவதி
மதுரை கலைநகர் பகுதியில் குடியிருப்புகளை வெள்ளநீர் சூழ்ந்ததால் பொதுமக்கள் சிரமத்திற்கு ஆளாகினர். மதுரை மாநகராட்சி 4-வது வார்டுக்கு உட்பட்ட கலைநகர் சந்திராகாலனி உள்ளிட்ட பகுதிகளில், ஆலங்குளம் கண்மாய்க்கு செல்லும் வெள்ளநீர், குடியிருப்பு பகுதியை சூழ்ந்தது. 4 நாட்களாக தொடர்ந்து, கால்வாயில் செல்லக்கூடிய நீரும், மழைநீரும் சேர்ந்து துர்நாற்றம் வீசுவதாக அப்பகுதி மக்கள் தெரிவித்தனர். பிரதான சாலையிலும் மழைநீர் தேங்கியுள்ளதால் வாகன ஓட்டிகள் சிரமத்திற்கு ஆளாகினர். ஆலங்குளம் கண்மாய்க்கு செல்லும் கால்வாய் தூர்வாரப்படாமல் கட்டிட ஆக்கிரமிப்புகள் உள்ளதால் தண்ணீர் வெளியேற முடியாத நிலை ஏற்பட்டுள்ளதாக தெரிவித்தனர்.