ஒரே நேரத்தில் 3 பள்ளி மாணவிகள் மாயம் - தூத்துக்குடியில் அதிர்ச்சி சம்பவம்

தூத்துக்குடியில், பள்ளி மாணவிகள் 3 பேர் காணாமல்போன சம்பவம் பரபரப்பை ஏற்படுத்தியுள்ளது.தூத்துக்குடி அரசு உதவி பெறும் பள்ளியில், முத்தையாபுரம் பகுதியை சேர்ந்த 3 மாணவிகள் 10ம் வகுப்பு படித்து வருகின்றனர். இவர்கள் நேற்று பள்ளிக்கு சென்ற நிலையில், மாலை பள்ளி முடிந்து வீடு திரும்பவில்லை என கூறப்படுகிறது. இதனைத் தொடர்ந்து மாணவிகளின் பெற்றோர் அவர்களை பல்வேறு இடங்களில் தேடியும் கிடைக்காததை தொடர்ந்து, தூத்துக்குடி மத்திய பாகம் காவல் நிலையத்தில் புகார் அளித்துள்ளனர். இந்த புகார் தொடர்பாக வழக்குப்பதிவு செய்துள்ள போலீசார், காணாமல்போன மாணவிகளை தேடும் பணியில் தீவிரமாக ஈடுபட்டுள்ளனர்.