தைப்பூச தேரோட்டம் திருவிழா கோலாகலம்

திருச்செந்தூர் சுப்பிரமணிய சுவாமி கோவிலில், தைப்பூச திருவிழா கோலாகலமாக கொண்டாடப்பட்டு வருகிறது. காவடி சுமந்தும், அலகு குத்தியும் அரோகரா கோஷமிட்டு, பக்தர்கள் சுவாமி தரிசனம் செய்து வருகின்றனர். திருச்செந்தூர் கடற்கரையே தெரியாத அளவிற்கு, லட்சக்கணக்கான பக்தர்கள் குவிந்துள்ளனர். தைப்பூச விழாவை ஒட்டி, கோவிலில் பலத்த பாதுகாப்பு ஏற்பாடுகள் செய்யப்பட்டுள்ளது. 

ஆறுபடை வீடுகளில் 5- ஆம் படைவீடான திருவள்ளூர் மாவட்டம், திருத்தணி முருகன் கோயிலில் தைப்பூச திருவிழா களைகட்டியுள்ளது. அதிகாலையில் மூலவருக்கு பால், பன்னீர், விபூதி, தேன் கொண்டு சிறப்பு அபிஷேகம் நடைபெற்றது.  பின்னர்  தங்கவேல், தங்க கிரீடம், மாணிக்க கல் மற்றும் வைர ஆபரணங்கள் அணிவித்து சிறப்பு தீபாராதனை நடைபெற்றது. இதில் திரளான பக்தர்கள் பங்கேற்று தரிசனம் செய்தனர்.  மாலையில் திருக்கல்யாணம் நிகழ்ச்சி நடைபெறுகிறது. 

தைப்பூச திருவிழாவை முன்னிட்டு கும்பகோணத்தை அடுத்த சுவாமிமலை சுவாமிநாத சுவாமி கோவிலில் ஏராளமான பக்தர்கள் குவிந்துள்ளனர். தைப்பூச விழா கடந்த மாதம் 30-ம் தேதி கொடியேற்றத்துடன் தொடங்கியது. இந்நிலையில் அதிகாலையில், மூலவர் சுவாமிநாத சுவாமிக்கு சிறப்பு அலங்காரம் செய்யப்பட்டு அபிஷேகம் நடைபெற்றது. சுமார் 12 மணி வெள்ளி மயில் வாகனத்தில் சுவாமி திருவீதி உலாவும், 2 மணிக்கு காவிரியில் தீர்த்தவாரி வைபவமும்  நடைபெறுகிறது. 

ஈரோடு மாவட்டம் சென்னிமலை முருகன் கோவிலில் தைப்பூச தேர்த்திருவிழாவை முன்னிட்டு தேரோட்டம் நடைபெற்றது.  தைப்பூச திருவிழா கடந்த மாதம் 31-ஆம் தேதி கொடியேற்றத்துடன் தொடங்கியது. இந்நிலையில், அதிகாலையில் வள்ளி -தெய்வானை சமேத ஸ்ரீமுத்துக்குமார சாமிக்கு மகா அபிஷேகம் நடைபெற்றது. பின்னர் தேரோட்டம் நடைபெற்றது.  இதில் திராளான பக்தர்கள் பங்கேற்று வடம் பிடித்து தேர் இழுத்தனர்.