வாகன சோதனையின் போது போலீசார் மீது தாக்குதல் : தப்பியோடியவர்களை கைது செய்த போலீஸ்

மதுரை அண்ணாநகர் காவல் சரகத்திற்கு உட்பட்ட மஸ்தான்பட்டியில் போலீசார் வாகன தணிக்கையில் ஈடுபட்டனர். அப்போது அவ்வழியாக வந்த ஆட்டோவை நிறுத்தி சோதனை மேற்கொள்ள முயன்றனர். இந்நிலையில் ஆட்டோவில் இருந்தவர்கள் தாங்கள் மறைத்து வைத்திருந்த ஆயுதங்களால் போலீசாரை தாக்க முயற்சித்து தப்பிவிட்டனர். இதனையடுத்து அவர்களை பிடிக்க தனிப்படை அமைக்கப்பட்டது. மாவட்ட நீதிமன்றம் அருகே அவர்களை போலீசார் கைது செய்தனர். அவர்களிடம் தனித்தனியே விசாரணை நடத்தியதில், முன்விரோதம் காரணமாக சில நபர்களை கொலை செய்ய ஆயுதங்களுடன் சென்றபோது போலீசார் சோதனையில் சிக்கியதாக தெரிவித்துள்ளனர். போலீசாரிடம் இருந்து தப்பிக்க ஆயுதங்களை கொண்டு காவலர்களை தாக்க முற்பட்டதாகவும் வாக்குமூலத்தில் தெரிவித்துள்ளனர். இதனையடுத்து கைது செய்யப்பட்டவர்களிடம் இருந்து ஆயுதங்களை பறிமுதல் செய்த போலீசார், அவர்கள் ஏழு பேரையும் நீதிமன்ற காவலுக்கு அனுப்பினர்.