"மோடி பிரசாரம் செய்த இடங்களில் இந்தியா கூட்டணி பிரமாண்ட வெற்றி" - கலாய்த்துவிட்ட சரத் பவார்

மகாராஷ்டிராவில் பிரதமர் மோடி பிரச்சாரம் செய்த இடமெல்லாம் இந்தியா கூட்டணி வெற்றி பெற்றிருப்பதாக குறிப்பிட்டுள்ள தேசியவாத காங்கிரஸ் சரத் சந்திர பவார் தலைவர் சரத் பவார், இதற்காக பிரதமர் மோடிக்கு நன்றி தெரிவித்துள்ளார்.

நடந்து முடிந்த மக்களவைத் தேர்தலில் மகாராஷ்டிராவில் மொத்தமுள்ள 48 தொகுதிகளில் பாஜக தலைமையிலான கூட்டணி 17 தொகுதிகளில் மட்டுமே வெற்றி பெற்ற நிலையில், காங்கிரஸ் தலைமையிலான மகாவிகாஸ் கூட்டணி 31 இடங்களை கைப்பற்றியுள்ளது.

இந்நிலையில் தேர்தல் முடிவுகள் தொடர்பாகவும், வாக்காளர்களுக்கு நன்றி தெரிவிக்கவும் கூட்டணி கட்சித் தலைவர்களான உத்தவ் தாக்கரே, சரத் பவார்

மற்றும் பிரித்விராஜ் சவான் ஆகியோர் கூட்டாக செய்தியாளர்களை சந்தித்தனர். அப்போது தேசிய ஜனநாயகக் கூட்டணி அரசு எத்தனை நாட்களுக்கு நீடிக்க போகிறது ? என்பதை பொறுத்திருந்து பார்க்க வேண்டும் என உத்தவ் தாக்கரே தெரிவித்தார்.

இதை தொடர்ந்து பேசிய சரத் பவார், மகாராஷ்டிராவில் பிரதமர் மோடி எங்கெல்லாம் பிரச்சாரம் செய்தாரோ அங்கெல்லாம் தங்கள் கூட்டணி வெற்றி பெற்றிருப்பதாக குறிப்பிட்டு, இதற்காக பிரதமர் மோடிக்கு நன்றி சொல்ல கடமைப்பட்டிருப்பதாக கூறினார்.