நாடாளுமன்றத் தேர்தலை முன்னிட்டு, ஒரே தொகுதிக்குட்பட்ட அண்டை மாவட்டங்களுக்கு அதிகாரிகளை பணியிட மாற்றம் செய்யக் கூடாது என தேர்தல் ஆணையம் தெரிவித்துள்ளது.
மக்களவைத் தேர்தலை முன்னிட்டு, சொந்த மாவட்டத்தில் அல்லது ஒரே இடத்தில் 3 ஆண்டுகளுக்குமேல் பணியாற்றிய அதிகாரிகளை பணியிட மாற்றம் செய்ய தேர்தல் ஆணையம் உத்தரவிட்டது. அவ்வாறு பணியிட மாற்றம் செய்யப்படும் அதிகாரிகள், ஒரே நாடாளுமன்ற தொகுதிக்குட்பட்ட மாவட்டங்கள் அல்லது அண்டை மாவட்டங்களில் பணியிட மாற்றம் செய்யப்படாமல் இருப்பதை உறுதி செய்ய வேண்டும் என, மாநில அரசுகள் மற்றும் யூனியன் பிரதேசங்களை தேர்தல் ஆணையம் கேட்டுக் கொண்டுள்ளது. பணியிடமாற்ற கொள்கையை பெயருக்காக பின்பற்ற வேண்டும் என்பதற்காக அல்லாமல், உண்மையான உணர்வுடன் பின்பற்ற வேண்டும் என அறிவுறுத்தியுள்ளது. ஏற்கனவே பணியிட மாற்றம் செய்யப்பட்டுள்ள அதிகாரிகளுக்கும், பின் தேதியிட்டு இந்த உத்தரவு பொருந்தும் என தேர்தல் ஆணையம் தெரிவித்துள்ளது.