இன்று மீண்டும் பதவியேற்கிறார், மோடி

நாடாளுமன்ற தேர்தலில் அமோக வெற்றி பெற்று, இரண்டாவது முறையாக பிரதமராக தேர்வான மோடி, இன்று இரவு 7 மணிக்கு பதவி ஏற்கிறார். டெல்லியில் குடியரசு தலைவர் மாளிகையில் நடைபெறும் விழாவில், அவருக்கு குடியரசு தலைவர் ராம்நாத் கோவிந்த் பதவி பிரமாணம் செய்து வைக்கிறார். மோடியுடன் புதிய மத்திய அமைச்சர்களும் பதவியேற்க உள்ளனர். பதவியேற்பு விழாவில் சர்வதேச நாடுகளின் தலைவர்கள் பங்கேற்க உள்ளனர். BIMSTEC எனும் அமைப்பில் இடம் பெற்றுள்ள வங்கதேசம், மியான்மர், இலங்கை, தாய்லாந்து, நேபாளம் மற்றும் பூடான், மொரிசியஸ், தாய்லாந்து உள்ளிட்ட நாடுகளின் தலைவர்கள் கலந்து கொள்கின்றனர். இதுபோல, முன்னாள் பிரதமர் மன்மோகன் சிங், ஐக்கிய முற்போக்கு கூட்டணி தலைவர் சோனியா காந்தி, காங்கிரஸ் தலைவர் ராகுல் காந்தி உள்ளிட்ட முக்கிய தலைவர்களும், பாஜகவை சேர்ந்த முதலமைச்சர்களும் பாஜக கூட்டணி கட்சிகளை சேர்ந்த மூத்த தலைவர்களும் கலந்து கொள்கின்றனர். தமிழக முதலமைச்சர் எடப்பாடி பழனிசாமி, துணை முதலமைச்சர் பன்னீர் செல்வம் ஆகியோரும் மோடியின் பதவியேற்பு விழாவில் பங்கேற்கின்றனர்.