வாஜ்பாய் மறைவு : தமிழக தலைவர்கள் இரங்கல்

முன்னாள் இந்திய பிரதமர் அடல் பிகாரி வாஜ்பாய் மறைவிற்கு தேமுதிக தலைவர் விஜயகாந்த் இரங்கல் தெரிவித்துள்ளார். வாஜ்பாய் காலமான செய்தி கேட்டு மிகவும் அதிர்ச்சியும், மன வேதனையும் அடைந்ததாக இரங்கல் செய்தியில் அவர் குறிப்பிட்டு உள்ளார். லஞ்சம் ஊழலுக்கு அப்பாற்பட்ட தலைவராகவும், அனைத்துக் கட்சியினராலும் பாராட்டப்பட்ட தலைவர் என்றும் வாஜ்பாய்க்கு விஜயகாந்த் புகழாரம் சூட்டி உள்ளார். 

அரசியல், ஆன்மீகம், அறிவியல், இலக்கியம், எழுத்து, நிர்வாகம் என பல்வேறு துறைகளில் திறமை மிக்கவராக விளங்கிய பன்முகத்திறன் கொண்ட வாஜ்பாய், வரலாற்றில் தனக்கென்று ஓர் தனி இடம் பிடித்தவர் என்று,  தமாகா தலைவர் ஜி.கே.வாசன் தெரிவித்துள்ளார். நாட்டிற்கு தன்னை முழுமையாக அர்ப்பணித்து கொண்ட மகத்தான மனிதர் என்றும் ஜி.கே. வாசன் தமது இரங்கல் செய்தியில் பெருமிதம் தெரிவித்துள்ளார். மேலும் பாஜகவினருக்கும், அவரது குடும்பத்தாருக்கும் த.மா.கா சார்பில் ஆழ்ந்த இரங்கலையும் ஜி.கே. வாசன் தெரிவித்துள்ளார். 

வாஜ்பாய்யின் தேச பக்தி மிகுந்த தொலைநோக்கு சிந்தனைகளும், திட்டங்களும் மக்களால் என்றும் போற்றத்தக்கவை என சமத்துவ மக்கள் கட்சி தலைவர் சரத்குமார் தெரிவித்துள்ளார். உலகின் மிகப்பெரிய ஜனநாயக நாட்டை அணு ஆயுத நாடாக அறிவித்து உலகெங்கிலும் இந்தியாவின் பெயர் ஒலிக்கச் செய்தவர் என்றும் சரத்குமார் குறிப்பிட்டுள்ளார்.

 "வாஜ்பாய் மரணத்தை ஏற்க மனம் மறுக்கிறது" - எச்.ராஜா

முன்னாள் பிரதமர் வாஜ்பாயின் மரணத்தை ஏற்க மனம் மறுப்பதாக பாஜக தேசிய செயலாளர் எச்.ராஜா தெரிவித்துள்ளார்.