18 வயதிற்கு மேல் அனைவருக்கும் தடுப்பூசி" - உச்ச நீதிமன்றத்தில் மத்திய அரசு தகவல்

இந்த ஆண்டு இறுதிக்குள் 18 வயதிற்கு மேலான அனைவருக்கும் தடுப்பூசி முழுமையாக செலுத்தப்பட்டு விடும் என மத்திய அரசு உச்ச நீதிமன்றத்தில்  தெரிவித்துள்ளது.கொரோனா பாதிப்பு தொடர்பாக தானாக முன்வந்து வழக்கு பதிவு செய்த உச்ச நீதிமன்றம் அதன் மீது பல்வேறு கட்டங்களாக விசாரணையை நடத்தி வருகிறது.தடுப்பூசி குறித்து கவனம் செலுத்தி வரும் உச்சநீதிமன்றம் இதற்காக தேசிய அளவிலான திட்டத்தை உருவாக்குமாறு மத்திய அரசுக்கு கடந்த விசாரணையின்போது உத்தரவிட்டிருந்தது.இந்த நிலையில், உச்ச நீதிமன்ற நீதிபதி டி.ஒய். சந்திரசூட் தலைமையிலான அமர்வு முன், வழக்கு மீண்டும் விசாரணைக்கு வந்தபோது மத்திய அரசு சார்பில் ஆஜரான சொலிசிட்டர் ஜெனரல் இந்த ஆண்டு இறுதிக்குள் 18 வயதிற்கு மேலான அனைவருக்கும் கொரோனா தடுப்பூசி செலுத்தப்பட்டு விடும் என தெரிவித்தார்.உள்நாட்டில் உற்பத்தி செய்யப்படும் தடுப்பூசிகளே போதுமானதாக இருக்கும் என்றும் இருப்பினும் தடுப்பூசி இறக்குமதி செய்யும் திட்டம் இருப்பதாகவும் மத்திய அரசு உச்ச நீதிமன்றத்தில் தெரிவித்தது.சீரம் நிறுவனம் பாரத் பயோடெக் நிறுவனம் ரெட்டி லேப் நிறுவனம் ஆகியவையே 18 வயதிற்கு மேலானவர்களுக்கு தேவையான தடுப்பூசிகளை உற்பத்தி செய்யும் திறன் படைத்தவை எனவும் சொலிசிட்டர் ஜெனரல் கூறினார்.அப்போது, கொரோனா தடுப்பூசி கிடைப்பதில் நாட்டின் பல பகுதிகளில் சிக்கல் இருக்கும் நிலையில் இவற்றை தவிர்க்க உடனடி நடவடிக்கை எடுக்குமாறு மத்திய அரசை நீதிபதிகள் கேட்டுக் கொண்டனர்.