"இளைஞனை போல் நேரத்தை செலவிட்டார் மோடி" - தொலைக்காட்சி சாகச நிகழ்ச்சியாளர் பியர் கிரில்ஸ் புகழாரம்

மனிதன் தனித்து விடப்பட்டால் எப்படி சமாளிப்பது என்பது தொடர்பாக தொலைக்காட்சிகளில் சாகச நிகழ்ச்சி நடத்தி வரும் பியர் கிரில்ஸ், பிரதமர் மோடியுடன் பங்கேற்ற நிகழ்ச்சி விரைவில் ஒளிபரப்பாக உள்ளது. உத்தர்காண்ட் மாநிலம் ஜிம் கார்பட் தேசிய பூங்காவில் மோடி பங்கேற்ற காட்சி படமாக்கப்பட்டுள்ளது. இந்நிலையில், பிரதமருடன் தனது பயண அனுபவங்கள் குறித்து பியர் கிரில்ஸ் விவரித்துள்ளார். அதில்,  சில ஆண்டுகளுக்கு முன்பாக அமெரிக்க முன்னாள் அதிபர் ஒபாமாவை அலாஸ்காவுக்கு அழைத்து சென்றது போன்ற வாய்ப்பு இது என தெரிவித்துள்ளார். இருவரும் சுற்றுச்சூழல் குறித்து விழிப்புணர்வை ஏற்படுத்தவே இந்த நிகழ்ச்சியில் கலந்து கொண்டதாகவும் பயணத்தின் போது இளைஞனை போல் மோடி நேரத்தை செலவிட்டதாகவும் அவர் கூறியுள்ளார். பிரதமர் மோடியின் அமைதி தன்னை ஆச்சரியப்பட வைத்ததாகவும் கிரில்ஸ் கூறினார். மோடியை சாகச பயணத்திற்கு அழைத்து சென்றது தனது பாக்கியம் என்றும் பியர் கிரில்ஸ் தெரிவித்துள்ளார். இந்த பயணத்தை தம்மால் என்றுமே மறக்க முடியாது என்றும் அவர் கூறினார்.