தத்ரூபமாக விபத்து போல சித்தரித்து மனைவியை கொன்ற கொடூர கணவன் - த்ரில்லர் படத்தை விஞ்சிய விபரீத மூளை

கோவை மாவட்டம் சூலூர் அருகே வாகராயம்பாளையம் பகுதியை சேர்ந்த அமிர்தராஜ் என்பவருக்கு விஜயலட்சுமி என்பவருடன் திருமணமான நிலையில், கலைவாணி என்பவருடனும் பழக்கம் ஏற்பட்டுள்ளது. இதனை மனைவி விஜயலட்சுமி தட்டிக்கேட்டதால் ஆத்திரமடைந்த அவர், கடந்த 2019 ஆம் ஆண்டு இளங்கோவன் என்பவர் மூலம் கொலை செய்துவிட்டு, மனைவி லாரி மோதி இறந்ததாக வழக்கை முடித்துள்ளார். இதையடுத்து, மனைவியை கொலை செய்ய உதவிய கூலிப்படை தலைவர் இளங்கோவனை தனக்கு சொந்தமான மற்றொரு வீட்டில் அமிர்தராஜ் தங்க வைத்த நிலையில், இளங்கோவன் கடந்த வெள்ளிக்கிழமை மர்ம நபர்களால் வெட்டி கொலை செய்யப்பட்டார். இதுதொடர்பாக கருமத்தம்பட்டி போலீசார் விசாரனை நடத்தியதில் அமிர்தராஜ் தான் கூலிப்படையை ஏவி கொலை செய்தது தெரியவந்தது. இதையடுத்து தலைமறைவாக இருந்த அமிர்தராஜ் மற்றும் அவரது கள்ளக்காதலி கலைவாணியை போலீசார் கைது செய்தனர். அவர்களிடம் நடத்திய கிடுக்கிப்பிடி விசாரணையில், அமிர்தராஜ் மனைவியை கொலை செய்த விவரம் 5 ஆண்டுகளுக்கு பிறகு வெளிச்சத்துக்கு வர, அந்த விபத்து வழக்கையும் கொலை வழக்காக மாற்றி போலீசார் விசாரணையை தொடங்கி உள்ளனர்.