சாலையை கடக்க முயன்றவர் மீது அதிவேகமாக மோதிய கார்.. சென்டர் மீடியனில் விழுந்து கதறல்

சென்னை கோயம்பேட்டில் இருந்து பூந்தமல்லி செல்லும் பிரதான சாலையில் அதிவேகமாக ஒரு கார் வந்து கொண்டிருந்தது. அப்போது சாலையை கடக்க முயன்ற நபர் மீது, அதிவேகமாக வந்த கார் கட்டுப்பாட்ட இழந்து மோதியது. இதில் தூக்கி வீசப்பட்ட அந்த நபர் சாலையின் நடுவே இருந்த தடுப்புக்குள் விழுந்து வலியால் துடித்தார். அவரது அலறல் சத்தம் கேட்டு உடனே அங்கிருந்தவர்கள் அவரை மீட்டு ஆம்புலன்ஸ் மூலம் சிகிச்சைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர்.

இந்த சம்பவம் குறித்து தகவல் அறிந்து வந்த கோயம்பேடு போக்குவரத்து புலனாய்வு போலீசார் விபத்து ஏற்படுத்திய காரை பறிமுதல் செய்தனர். அத்துடன் விபத்துக்கான காரணம் குறித்து விசாரணை மேற்கொண்டு வருகின்றனர். சாலையை கடக்க முயன்ற நபர் மீது அதிவேகமாக வந்த கார் மோதிய சம்பவம் அப்பகுதியில் பரபரப்பை ஏற்படுத்தியது. இந்த விபத்தால் அப்பகுதியில் ஏற்பட்ட போக்குவரத்து நெரிசலை பின்னர் போலீசார் சீர்படுத்தினர்..