கோலிவுட்டின் லேடி சூப்பர்ஸ்டார் என பலராலும் பாராட்டப்படும் நயன் தாராவும், முன்னணி நடிகரான தனுஷும் சிறந்த நண்பர்களாகவே அறியப்பட்டனர்..
யாரடி நீ மோகினி படத்தில் இணைந்து நடித்த இந்த ஜோடி, அடுத்தடுத்து படங்களுக்கு நடிக்கவில்லை என்றாலும் திரையுலகில் முக்கிய நண்பர்களாக வலம் வந்தனர்.
இந்நிலையில் நட்பின் அடையாளமாக அமைந்தது எதிர்நீச்சல் படத்தில் இடம்பெற்ற சத்தியமா நீ எனக்கு தேவையேயில்ல பாடல்...
நடிகர் ரஜினி, விஜய் போன்ற டாப் நடிகர்களுக்காக அவர்களது படங்களில் ஒரு பாடலுக்கு நடனம் ஆடிய நயன்தாரா, தனுஷ் தயாரிப்பில் உருவான படம் என்பதற்காகவே நட்பு பாராட்டும் விதமாக அப்பாடலில் நடனமாடியிருப்பார்...
ஒரு பாடலில் மட்டும் நடனமாட கோடிகளில் சம்பளம் வாங்கும் சூழலில், எதிர்நீச்சலில் இடம்பெற்ற பாடலில் நடனமாடுவதற்கு சம்பளமே வாங்காமல் நடித்து முடித்து கொடுத்திருக்கிறார் நயன்...
இப்படியாக நட்பில் இருந்த தனுஷ் - நயன் தாரா, மீண்டும் நானும் ரவுடி தான் படத்தில் சேர்ந்தனர். தனுஷ் தயாரித்த இப்படத்தை, விக்னேஷ் சிவன் இயக்க, நயன் தாரா மற்றும் விஜய் சேதுபதி நடித்திருந்தனர்.
இத்திரைப்படம் விமர்சன ரீதியாக பெரும் வரவேற்பை பெற, நயனின் காதம்பரி கதாபாத்திரம் ரசிகர்களை கவர்ந்தது...
இது மட்டுமன்றி காதம்பரி கதாபாத்திரத்திற்காக சிறந்த நடிகைக்கான விருதையும் பெற்றிருந்தார் நயன்..
ஆனால் இந்த வெற்றியை தயாரிப்பாளர் தரப்பில் கொண்டாடப்படவில்லை என்றே கூறப்படுகிறது..
அதனை மெய்ப்பிக்கும் வகையில் பல தகவல்களை தனது அறிக்கையில் பகிர்ந்துள்ளார் நயன். நானும் ரவுடி தான் படம் வெளியாகி 10 ஆண்டுகள் ஆகிவிட்டது, ஆனால் தனுஷ் இதுவரையில் இழிவான எண்ணங்களுடன் முகமூடி அணிந்து கொண்டிருக்கிறார் என குறிப்பிட்டுள்ளார்.
மேலும் ஒரு தயாரிப்பாளராக உங்களுக்கு வெற்றியை தேடி தந்த படமாகவும், இன்றளவும் ரசிகர்களால் ரசிக்கப்படும் படமாகவும் உள்ள நானும் ரவுடி தான் படம் குறித்து நீங்கள் சொன்ன மோசமான விஷயங்களை நான் மறக்கவில்லை எனக் குறிப்பிட்டுள்ளார்.
படத்தின் வெளியீட்டிற்கு முன் நீங்கள் சொன்ன வார்த்தைகள், ஆறாத வடுக்களாக எங்கள் மனதில் உள்ளது, படம் பிளாக்பஸ்டர் ஹிட் ஆன பிறகு உங்கள் ஈகோவால் மிகவும் பாதிக்கப்பட்டது என்பதை திரைப்பட வட்டாரங்கள் மூலம் அறிந்தேன் என குறிப்பிட்டுள்ளார்.
இந்நிலையில், 2016ம் ஆண்டு நடந்த விருது விழா வீடியோ ஒன்றை நினைவுக்கூர்ந்து, நயன் குறிப்பிட்டுள்ள சம்பவங்கள் மெய்ப்பிக்கும் வகையில் அமைந்துள்ளதாக கூறி வைரலாக்கி வருகின்றனர் நயனின் ரசிகர்கள்...
விருது விழா மேடையிலேயே, நானும் ரவுடி தான் படத்தில் தன்னுடைய நடிப்பு தனுஷுக்கு பிடிக்கவில்லை என நயன் கூறியிருந்த அந்த வீடியோ இணையத்தில் தீயாய் பரவி வருகிறது...
அதே வேளையில், திரைத்துறையில் நயனுக்கு ஆதரவு கூடி வருகிறது. தனுஷுக்கு எதிராக நயன் வெளியிட்டுள்ள பதிவை, தனுஷுடன் மரியான் படத்தில் நடித்த பார்வதி, நய்யாண்டி படத்தில் நடித்த நஸ்ரியா, வடசென்னை படத்தில் நடித்த ஐஸ்வர்யா ராஜேஷ், ஜகமே தந்திரம் படத்தில் நடித்த ஐஸ்வர்யா லட்சுமி, 3 படத்தில் நடித்த ஸ்ருதி ஹாசன், உள்ளிட்டோர் லைக் செய்துள்ளனர்.
மற்றொரு புறம் பத்து ஆண்டுகளாக தனுஷுக்கும் நயன் தாராவுக்கும் இடையே இவ்வளவு பிரச்சனை இருந்து வந்ததா என ? என கேள்வி எழுப்பும் இணையவாசிகள், தனுஷ் தரப்பு விளக்கத்திற்காக காத்துக் கொண்டிருக்கின்றனர்.
மேலும், நயன் தாரா தனது திருமண ஆவணப்படத்தில் நானும் ரவுடி தான் படக் காட்சிகளை பயன்படுத்தி விட்டு அதன் பின்னரே அனுமதி கேட்டதாகவும், அதையும் முறைப்படி கேட்காமல் பல வழிகளில் அழுத்தம் கொடுத்து கேட்டதால், தனுஷ் அனுமதி தர மறுத்ததாக கூறப்படுகிறது..
இருப்பினும் எவ்வித விளக்கமும் தனுஷ் தரப்பில் அளிக்கப்படாத சூழலில், இணையத்தில் பலவிதமான விளக்கங்கள் உலா வரத் தொடங்கியுள்ளன...