துப்பாக்கி தயாரித்த இளைஞர்கள்.. போட்ட பிளான்- வெளியான ஷாக் தகவல் - சேலத்தில் பரபரப்பு -என்ஐஏ அதிரடி

சேலத்தில் துப்பாக்கி தயாரித்த வழக்கில் கைதான மூன்று இளைஞர்கள், தேசிய பாதுகாப்பு சட்டத்திலும் கைது செய்யப்பட்டுள்ளனர்.

சேலம் ஓமலூர் அருகே புளியம்பட்டியில் கடந்த மே மாதம் 19 ஆம் தேதி நடந்த வாகன தணிக்கையின்போது, இளைஞர்களிடம் கை துப்பாக்கி, நாட்டுத் துப்பாக்கி உள்ளிட்ட பொருட்களை போலீசார் பறிமுதல் செய்தனர். இதுதொடர்பாக சேலம் செவ்வாய்பேட்டை பகுதியை சேர்ந்த சஞ்சய் பிரகாஷ், சன்னியாசிகுண்டு பகுதியை சேர்ந்த நவீன்சக்கரவர்த்தி, இவர்களுக்கு உடந்தையாக இருந்து அழகாபுரத்தை சேர்ந்த கபிலன் ஆகியோரை போலீசார் கைது செய்தனர். இதுகுறித்து தேசிய புலனாய்வு முகமை அதிகாரிகள் விசாரணை நடத்தி, துப்பாக்கி தயாரிப்பதற்கான பொருட்கள், வெடிபொருட்கள் உள்ளிட்டவற்றை கைப்பற்றினர். உலக தமிழ் நீதிமன்றம் என்ற அமைப்பை ஏற்படுத்தி, டாஸ்மாக் கடைகள் உள்ளிட்ட பகுதிகளை தாக்க திட்டமிட்டதும், விடுதலைப்புலிகள் அமைப்பிற்கு ஆதரவாக செயல்பட்டதும் தெரிய வந்தது. இதையடுத்து மூவர் மீது தேசிய பாதுகாப்பு சட்டத்தின் கீழ் என்ஐஏ அதிகாரிகள் வழக்குப்பதிவு செய்துள்ளனர்.