நாட்டு வெடிகுண்டுகளுடன் சுற்றித்திரிந்த ரவுடிகள் - விசாரணையில் வெளிவந்த அதிர்ச்சி தகவல்

புதுச்சேரியில் நாட்டு வெடிகுண்டுகளுடன் சுற்றிய 3 ரவுடிகளை போலீசார் கைது செய்தனர். புதுச்சேரி முதலியார்பேட்டை பகுதியில் வாகன தனிக்கையில் ஈடுபட்டு கொண்டிருந்த போலீசார், அப்போது சந்தேகத்திற்கு இடமளிக்கும் வகையில் இரு சக்கர வாகனங்களில் வந்த 5 இளைஞர்களை பிடிக்க முற்பட்டனர். இதில், இருவர் தப்பி சென்ற நிலையில், மூவரை பிடித்த போலீசார், அவர்களை சோதனை செய்தனர். அப்போது, அவர்கள் வைத்திருந்த சாக்கு மூட்டையில் 3 நாட்டு வெடிகுண்டுகளும், ஆயுதங்களும் போலீசாரால் கைப்பற்றப்பட்டது அதிர்ச்சியை ஏற்படுத்தியது. விசாரணையில், மூவர் மீதும் கொலை வழக்குகள் நிலுவையில் இருப்பதும், தப்பியோடிய இருவரில் ஒருவர் அரியாகுப்பத்தை சேர்ந்த முகிலன் என்பதும் தெரியவந்துள்ளது. முன்விரோதத்தில் முகிலனை சிலர் கொலை செய்ய திட்டமிட்டிருப்பதாகவும், அதனால் அவர்களை கொலை செய்ய நாட்டுவெடிகுண்டுகளுடன் சென்றதாகவும் மூவர் கூறியது அதிர்ச்சியை ஏற்படுத்தியது. மூவரையும் சிறையிலடைத்த போலீசார், தப்பியோடிய முகிலன் உட்பட இருவரை தேடி வருகின்றனர்.