மனைவியையும், கள்ளக்காதலனையும் குத்திய கணவன்...ரத்த வெள்ளத்தில் சரிந்த கள்ளக்காதலன் - தேனியில் அதிர்ச்சி சம்பவம்

தேனி மாவட்டம் ஆண்டிப்பட்டியில், கள்ளக்காதலனையும், மனைவியையும் கத்தியால் கணவன் சரமாரியாக குத்திய சம்பவம் பரபரப்பை ஏற்படுத்தியுள்ளது. ஆண்டிப்பட்டி தாலுகா கோம்பைத்தொழு கிராமத்தைச் சேர்ந்தவர் தீபாவளி. ஏற்கனவே திருமணமாகி விவகாரத்து பெற்ற தீபாவளி, சங்கீதா என்ற பெண்ணை இரண்டாவதாக திருமணம் செய்த நிலையில், 7 வயதில் ஒரு மகன் உள்ளார். அதே கிராமத்தைச் சேர்ந்த ஈஸ்வரன் என்பவரிடம், தீபாவளியின் மனைவி சங்கீதா தகாத உறவில் இருந்து வந்துள்ளார். இந்த விவகாரம் தெரியவரவே, இருவரையும் தீபாவளி கண்டித்ததாக கூறப்படுகிறது. இந்த நிலையில், கடந்த சில நாட்களுக்கு முன்பு சங்கீதாவும், ஈஸ்வரனும் ஊரைவிட்டு ஓடிய நிலையில், மீண்டும் இருவரும் ஆண்டிப்பட்டிக்கு பேருந்தில் வந்து இறங்கினர். இதனை அறிந்த தீபாவளி, மறைத்து வைத்திருந்த கத்தியால், இருவரையும் சரமாரியாக குத்தினார். இதில் ரத்த வெள்ளத்தில் சரிந்த ஈஸ்வரன் சம்பவ இடத்திலேயே உயிரிழந்த நிலையில், படுகாயமடைந்த சங்கீதாவிற்கு, மருத்துவமனையில் தீவிர சிகிச்சை அளிக்கப்பட்டு வருகிறது. இந்த சம்பவம் அப்பகுதியில் பரபரப்பை ஏற்படுத்திய நிலையில், கத்தியால் குத்திய தீபாவளி காவல்நிலையத்தில் சரணடைந்தார்.