தாரமங்கலம் ஊராட்சி ஒன்றியத்தில் உள்ள அழகுசமுத்திரம் கிராமத்தின் பேருந்து நிறுத்தத்தில் இருந்து சஞ்சீவிராயன் கோவில் செல்லும் வரை தார் சாலை அமைப்பதற்கான பணிகள் தொடங்கப்பட்டு பாதியிலேயே நிறுத்தப்பட்டுள்ளது. சாலைப் பணி கிடப்பில் போடப்பட்டதால் அப்பகுதி மக்கள் அவதி அடைந்துள்ளனர். சாலைப் பணியை மீண்டும் தொடங்க மனு அளித்தும் நடவடிக்கை எடுக்கப்படவில்லை எனக் கூறப்படுகிறது. இந்நிலையில் புதிதாக சாலை அமைத்து தரக்கோரி அப்பகுதியைச் சேர்ந்த ஏராளமான கிராம மக்கள், திடீரென சாலை மறியல் போராட்டத்தில் ஈடுபட்டனர். அந்த வழியாக வந்த ஆம்புலன்ஸ் உள்ளிட்ட வாகனங்களையும் அவர்கள் வழிமறித்தனர். தகவல் அறிந்து வந்த தாரமங்கலம் போலீசார், கிராம மக்களுடன் பேச்சுவார்த்தை நடத்தினர். இதன்பிறகு கிராம மக்கள் கலைந்து சென்ற நிலையில், சாலை மறியல் போராட்டத்தால் அப்பகுதியில் சுமார் ஒரு மணி நேரம் போக்குவரத்து பாதிக்கப்பட்டது