சென்னை ரயிலுக்குள் புகுந்த ராக்கெட்.. அலறி கத்திய பயணிகள்
சென்னை கொருக்குப்பேட்டையில், சிறுவர்கள் வெடித்த ராக்கெட் பட்டாசு, ரயிலுக்குள் புகுந்து வெடித்ததால் பயணிகள் பீதியடைந்தனர்.
சென்னை சென்ட்ரலில் இருந்து கும்மிடிப்பூண்டி நோக்கி சென்ற மின்சார ரயில், பேசின்பிரிட்ஜ் - கொருக்குப்பேட்டை இடையே சிக்னலுக்காக நின்று கொண்டிருந்தது. அப்போது அருகே உள்ள குடியிருப்புகளில் சிறுவர்கள் வெடித்த ராக்கெட், ரயிலின் கடைசி பெட்டிக்குள் புகுந்து வெடித்தது. இதனால் ரயிலில் இருந்த பயணிகள் அச்சமடைந்தனர். இதில் பயணிகள் சிலரின் உடைகளில் தீப்பொறி பட்டு சேதமடைந்தது. ரயிலுக்குள் ராக்கெட் புகுவதை பார்த்ததும், பட்டாசு வெடித்து கொண்டிருந்த சிறுவர்கள் ஓட்டம்பிடித்தனர். இதையடுத்து, சிக்னல் போட்ட பின், ரயில் அங்கிருந்து புறப்பட்டு சென்றது. அதிர்ஷ்டவசமாக இந்த விபத்தில் யாருக்கும் பெரிய அளவு காயம் ஏற்படவில்லை என்று கூறப்படுகிறது.