அமரன் கிளைமேக்ஸ் நெருங்கும் நேரம் கொந்தளித்த ரசிகர்கள்.. டிக்கெட் காசை திருப்பி கொடுத்த தியேட்டர்
அமரன் கிளைமேக்ஸ் நெருங்கும் நேரம் கொந்தளித்த ரசிகர்கள்.. டிக்கெட் காசை திருப்பி கொடுத்த தியேட்டர்
சென்னை கீழ்ப்பாக்கத்தில் உள்ள சங்கம் திரையரங்கில் திடீர் தொழில்நுட்ப கோளாறு காரணத்தால், அமரன் திரைப்படத்தின் கிளைமாக்ஸ் காட்சி திரையிடப்படாததால் திரையரங்கு ஊழியர்களிடம் ரசிகர்கள் வாக்குவாதத்தில் ஈடுபட்டனர்.
நடிகர் சிவகார்த்திகேயன் நடித்துள்ள அமரன் திரைப்படம், சென்னை கீழ்ப்பாக்கத்தில் உள்ள சங்கம் திரையரங்கில் தீபாவளிக்கு வெளியாகியுள்ளது. வெள்ளிக்கிழமை மாலை காட்சிக்கு திரையிடப்பட்ட அமரன் படம் ஒன்றரை மணி நேரத்தில் தொழில்நுட்ப கோளாறால் நிறுத்தப்பட்டது. விரைவில் படம் தொடங்கும் என்று திரையரங்கு ஊழியர்கள் அறிவித்ததால் ஒன்றரை மணி நேரமாக காத்திருந்த ரசிகர்கள், கோபமடைந்து, திரையரங்க அலுவலகத்தில் பணிபுரியும் ஊழியர்களிடம் கடும் வாக்குவாதத்தில் ஈடுபட்டனர். தகவல் அறிந்து வந்த போலீசார் விசாரித்தபோது, விடுபட்ட காட்சியை மட்டும் மீண்டும் திரையிடுவதாக திரையரங்கு ஊழியர்கள் தெரிவித்தனர். ஏற்கெனவே ஒன்றரை மணி நேரம் கால தாமதமாகி விட்டதாக கூறிய ரசிகர்கள், டிக்கெட் கட்டணத்தை திருப்பித் தருமாறு கேட்டு வாக்குவாதத்தில் ஈடுபட்டனர். அதன் பிறகு டிக்கெட் கட்டணத்தை திருப்பித் தருவதாக திரையரங்கு தரப்பில் ஒப்புக் கொண்டதை அடுத்து, பொதுமக்கள் கலைந்து சென்றனர். இந்த சம்பவத்தால் திரையரங்க வளாகத்தில் சிறிது நேரம் பரபரப்பு நிலவியது.