ரூ. 250 கோடி டெண்டர்கள் ரத்து - சென்னை மாநகராட்சி அடுத்தடுத்து அதிரடி

கடந்த ஒரு வாரத்தில் சுமார் 250 கோடி ரூபாய் மதிப்பிலான டெண்டர்களை சென்னை மாநகராட்சி ரத்து செய்திருக்கிறது. இதன் பின்னணி குறித்து பார்க்கலாம்..தலைநகர் சென்னையை சீரமைக்கும் வகையில், சாலை மேம்பாடு, பூங்காக்கள் மற்றும் மழைநீர் வடிகால் புனரமைப்பு போன்ற பல்வேறு பணிகளை, ஒப்பந்ததாரர்களிடம் வழங்கி இருக்கிறது சென்னை மாநகராட்சி. டெண்டர் நடைமுறைகள் முறையாக பின்பற்றப்படுவதில்லை என தொடர் புகார்கள் எழுந்த நிலையில், ஒப்பந்தப் பணிகளை மாநகராட்சி தரப்பு அதிரடியாக ஆய்வு செய்தது. அடையாறு, அண்ணாநகர், கோடம்பாக்கம், ராயபுரம் உள்ளிட்ட 43 பகுதிகளில், மழைநீர் வடிகால்களை சீரமைத்தல் மற்றும் புதுப்பித்தல் பணிகளுக்காக, பிப்ரவரி மாதம் 120 கோடி ரூபாய் மதிப்பில் ஒப்பந்தம் விடப்பட்டது. இதில் முறைகேடு நடந்திருப்பது கண்டுபிடிக்கப்பட்டதால், ஒப்பந்தத்தை ரத்து செய்திருக்கிறது சென்னை மாநகராட்சி.இதேபோல், 15 மண்டலங்களில் 120 கோடி ரூபாய் மதிப்பில், ஆயிரத்து 500 ஸ்மார்ட் கம்பங்கள் அமைக்க விடப்பட்ட ஒப்பந்தமும் முறைகேடு காரணமாக ரத்து செய்யப்பட்டுள்ளது.சென்னை மாநகராட்சியின் சமூக வலைதள பக்கங்களை பராமரிக்க, 2 கோடி மதிப்பீட்டில் விடப்பட்ட ஒப்பந்தமும் ரத்தாகி உள்ளது.இப்படி, ஒரே வாரத்தில் சுமார் 250 கோடி ரூபாய் மதிப்பிலான ஒப்பந்தப் பணிகளை சென்னை மாநகராட்சி அதிரடியாக ரத்து செய்திருக்கும்நிலையில், ஒப்பந்தப் பணிகளை தொடர்ந்து ஆய்வு செய்து வருவது குறிப்பிடத்தக்கது.