திமுக எம்.பிக்களுடன் ஸ்டாலின் பல்வேறு முக்கிய விஷயங்கள் குறித்து ஆலோசனை

சென்னை அண்ணா அறிவாலயத்தில் திமுக எம்.பி.க்கள் ஆலோசனை கூட்டம் நடைபெற்றது. திமுக தலைவர் ஸ்டாலின் தலைமையில் நடைபெற்ற இந்த ஆலோசனை கூட்டத்தில்,  பொருளாளர் துரைமுருகன் மற்றும் மக்களவை, மாநிலங்களவை உறுப்பினர்கள் கலந்து கொண்டனர். முதன்முறையாக எம்.பியாக தேர்வாகி உள்ள 13 பேரும் இந்தக் கூட்டத்தில் பங்கேற்றனர்.  வருகிற செப்டம்பர் மாதத்தில் நன்றி அறிவிப்பு கூட்டத்தை நடத்தி முடிப்பது, மக்களை சந்தித்து குறைகள் அறியும் கூட்டத்தை நடத்துவது, நாடாளுமன்றத்தில் தொகுதி திட்டங்களுக்காக பேசியதை மக்களிடம் கொண்டு சேர்ப்பது உள்ளிட்ட விஷயங்கள் குறித்து இந்த கூட்டத்தில் ஆலோசிக்கப்பட்டது. அடுத்து வரும் தமிழக சட்டமன்ற தேர்தலை வெற்றிகரமாக சந்திக்க, அனைத்து தொகுதிகளிலும் மக்கள் சார்ந்த திட்டங்களில் எம்பிக்கள் கவனம் செலுத்த வேண்டும் என்றும், தொகுதியில் அலுவலகங்கள் திறந்து எம்.பிக்கள் செயல்பட வேண்டும் என்றும் அறிவுரைகள் வழங்கப்பட்டது. கூட்டத்தில், தலைவர் பொறுப்பை ஏற்று, நேற்றுடன் ஓராண்டை நிறைவு செய்த ஸ்டாலினுக்கு, திமுக எம்.பிக்கள் வாழ்த்து தெரிவித்தனர்.