நீட் தோல்வி - மேலும் ஒரு மாணவி தற்கொலை

விழுப்புரம் மாவட்டம் திண்டிவனம் அருகே மரக்காணம் கூனிமேடு குப்பம் பகுதியை சேர்ந்தவர் மோகன். மருத்துவராகும் கனவு கொண்ட இவரது மகள் மோனிஷா, கடந்த மாதம் நடைபெற்ற நீட் தேர்வினை எழுதியுள்ளார். தேர்வு முடிவுகள் நேற்று வெளியான நிலையில், மாணவி மோனிஷா, நீட் தேர்வில் தோல்வி அடைந்த‌து தெரிய வந்துள்ளது. இதனால் விரக்தியடைந்த மோனிஷா, தனது துப்பட்டாவால்,  மின் விசிறியில் தூக்கிட்டு தற்கொலை செய்து கொண்டதாக கூறப்படுகிறது.  உயிரிழந்த மாணவியின் உடல் புதுச்சேரியில் உள்ள பிம்ஸ் மருத்துவமனையில் வைக்கப்பட்டுள்ளது. தற்கொலைக்கு முன்பு, மாணவி ஒரு கடிதம் எழுதியுள்ளதாக கூறப்படுகிறது. அதைக் கைப்பற்றி, மாணவியின் மரணம் குறித்து மரக்காணம் போலீசார் வழக்கு பதிவு செய்து விசாரணை நடத்தி வருகின்றனர்.