கர்ப்பிணி பெண் பலி - தவறான சிகிச்சை காரணமா? : மருத்துவமனையை முற்றுகையிட்ட உறவினர்கள்

திருவண்ணாமலையை அடுத்த செல்லங்குப்பம் கிராமத்தை சேர்ந்த 

கூலி தொழிலாளி ராஜாவின் மனைவி கவிதா, நேற்று இரவு பரிசோதனைக்காக  தனியார் மருத்துவமனைக்கு சென்றுள்ளார். அங்கு அவருக்கு ரத்த குறைவாக இருப்பதாக கூறிய மருத்துவர்கள், உடனடியாக அறுவை சிகிச்சை செய்ய வேண்டும் என்று கூறியுள்ளனர்.ஏற்கனவே இரண்டு பெண்கள் உள்ள நிலையில், கவிதாவிற்கு மூன்றாவதாக ஆண் குழந்தை பிறந்துள்ளது. இதையடுத்த, ரத்த குறைவாக இருப்பதாக கூறி தனியார் மருத்துவமனை ஊழியர்கள், கவிதாவை திருவண்ணாமலை அரசு மருத்துவமனைக்கு அழைத்துச் சென்றுள்ளனர். அங்கு அவர் ஏற்கனவே இறந்துவிட்டதாக மருத்துவர்கள் கூறினர். தவறான சிகிச்சை காரணமாகவே கவிதா உயிரிழந்ததாக அவரது உறவினர்கள் தனியார் மருத்துவமனையை முற்றுகையிட்டனர். கடந்த 2 வாரங்களுக்கு முன்பு, கிணற்றை  தூர் வாரும் பொழுது ஏற்பட்ட விபத்தில் சிக்கிய கவிதாவின் கணவருக்கு தீவிர சிகிச்சை அளிக்கப்பட்டு வரும் நிலையில், பிரசவத்தின் போது மனைவியும் உயிரிழந்துள்ள சம்பவம் கிராம மக்களை சோகத்தில் ஆழ்த்தியுள்ளது.